Bakıdakı bəzi restoranlarda əlavə servis haqqının tələb olması müştərilər arasında narazılıqlar yaradır. Belə ki, restoranların bir çoxunda masa hesabı istəyən müştəridən "servis haqqı" tələb olunur.  Əksər hallarda isə bu haqda müştəriyə əvvəlcədən xəbərdarlıq edilmir.  

Hesabı ödəmək istəyən qonağa təqdim edilən qəbzdə sifariş etdiyi məhsulların qiymətinin altında "servis haqqı" məbləği qeyd edilir ki, bu da restorandan asılı olaraq ümumi məbləğin 10, 15, 20 faizini təşkil edir. 

Bəs nəzərdə tutulan bu cür hərəkətlər qanuna ziddirmi? Ümumiyyətlə müştərinin xəbəri olmadan servis haqqını almaq nə dərəcədə doğrudur?

Azad İstehlakçılar Birliyinin sədri Eyyub Hüseynov Ednews-a açıqlaması zamanı bildirib ki, müştəri öncədən servis haqqı ilə bağlı məlumatlı olmalıdır.

“Hazırki vəziyyət onu göstərir ki, restoranlar üçün heç bir standart qayda yoxdur. Belə “qaydalar” yolverilməzdir. Əlavə servis haqqının alınmasına gəlincə nəinki 10 faiz hətta bəzən 20,25 faiz də servis haqqı alan restoranlar var. Birmənalı şəkildə öncədən müştəriyə neçə faiz servis haqqının verilməsi haqqında məlumat verilməlidir, bu mütləq şəkildə menyuda göstərilməlidir, kassa qəbzində görülməlidir. Sui istifadə hallarının olması yolverilməzdir və bu birbaşa istehlakçı hüquqlarının pozulmasıdır, bununla bağlı hökumətin sabit qərarı olmalıdır”. 

Bütün dünyada adət halını alan servis haqqı bəzən müştərini aldadılmasına gətirib çıxarır. Deputat Vüqar Bayramov müvafiq dövlət qurumlarının bu kimi hallara nəzarətin olmasını qeyd edib. 

“Servis haqqı xarici ölkələrdə də alınır. Ölkəmizdə reallaşan bu xidmətdən narazı qalanlar əlbəttə ki, var. Ancaq müştərilərin əksəriyyətinə əvvəlcədən xəbərdarlıq verilmir. Buna müvafiq qurumlar nəzarət etməlidirlər. Belə özbaşınalıq yolverilməzdir. O ki, qaldı servis haqqlarının nə qədər olmasına bu restorana görə dəyişir”.

Ləman Abbaslı