1 avqust-Azərbaycan əlifbası və Azərbaycan dili günüdür.
Hər bir xalqın milli mədəniyyətinin tərkib hissəsi onun əlifbası, yazı sistemidir. Dünya dilləri arasında xüsusi yeri olan Azərbaycan dilinin orijinallığının qorunması məsələsi isə hələ də mübahisəli mövzu olaraq qalır.
Azərbaycan dilinin saflığının qorunması və onun dünyada təbliğatı hər birimizin öhdəliyidir.
Bəs üzərimizə düşən öhdəliyi yerinə yetiririkmi?
Məsələ ilə bağlı Ednews-a danışan "Ayna" — "Zerkalo" qəzetlərinin baş redaktoru Elçin Şıxlı qeyd edib ki, Azərbaycan dilinin tanıdılması kompleks şəkildə aparılmalıdır.
“Azərbaycan dili dünən, sırağagün yaranmayıb. Əsrlərdir Azərbaycan dili mövcuddur. Onun tanıdılması isə tək başa gəlmir. Dili tanıtmaq üçün ilk əvvəl dünyada ölkəni təbliğ etməlisən. Çünki ölkəni tanıyan dili ilə də maraqlanacaq. Bunların hamısı kompleks şəkildə olunan işlərdir. Azərbaycanı artıq kifayət qədər tanıyırlar, çünki Azərbaycan qalib ölkə kimi özünü bütün dünyada tanıdıb. Hər insan ana dilində danışmaqdan yorulmamalıdır. Ona görə biz dilimizin öyrədilməsi, tanıdılması yönündə təşəbbüs göstərməliyik”.
Hazırda dilçi alimlər də Azərbaycan dilinin öyrənib, tanıdılması istiqamətində böyük işlər görür. AMEA-nın Dilçilik İnistituun mətbuat katibi Təranə Çərkəz qızı ana dilinin təbliğatı üçün görülən təşəbbüslərdən danışıb.
“Dilimizin tanıdılması ilə bağlı Türkdilli dövlətlər arasında Beynəlxalq konfranslar keçirilir.Əməkdaşlarımız belə konfranslarda çıxışlar edir, dilimizin zənginliyini nitqlərində göstərir. Xarici tələbələrə Azərbaycan universitetlərində göstərilən qayğı və onlara dilimizi tanıtmaq buna misaldır. Bundan başqa Dilçilik İnistitunda ikidilli lüğətlər tirajlanır. Bunlar hər biri Azərbaycan dilini tanıdılması üçün görülən işlərdir. Konfranslarda, layihələrdə xaricilərlə görüşdən belə qərara gəlirik ki, onların da dilimizi öyrənməklə bağlı istəkləri var. Ancaq dilin saflığının qorunması prosesində təkcə dilçilər yox, bütün vətəndaşlar çalışmalıdır”.
Dil təkcə ünsiyyət vasitəsi deyil, həm də xalqın tarixi, ədəbiyyatı, mədəniyyətidir. Bu mədəniyyəti qoruyub saxlamaq isə bizlərə düşür.
Ləman Abbaslı