Son günlər tez-tez Azərbaycan Ordusunun müddətdən artıq həqiqi hərbi xidmət qulluqçuların xidmət zamanı smartfon tipli telefon istifadə etməsi, eləcə də şəxsi hesablarında xidmətə aid foto-video görüntüləri paylaşması aşkar edilir. Nəticədə hərbi qulluqçular ordudan kənarlaşdırılır. Maraqlıdır, bəs belə şəxslər sosial şəbəkə istifadə etməklə hansı qayda pozuntusuna yol vermiş olur?  

 

Hərbi ekspert Ədalət Verdiyev Ednews-a açıqlaması zamanı bildirib ki, bu, hərbi sirrin pozulması deməkdir və görülən tədbirlərin əsas məqsədi ordudakı digər hərbiçilərin həyat və təhlükəsizliyini qorumaqdır. 

 

 

“Bu hallar milli və dövlət maraqlarına ziyan vura biləcək hərbi sirlərin yayılması ilə bağlıdır. Dəfələrlə xəbərdarlıq edilməsinə baxmayaraq, bu effektiv təsir göstərmir. Nəticə etibarilə əsgərimizin yerləşdiyi əraziləri, hərbi karvanlarının yerdəyişməsini əks etdirən kadrlar belələri tərəfindən sosial şəbəkədə yayılır. Bu da orada xidmət edən hərbi qulluqçuların həyat və təhlükəsizliyi üçün real təhdidlər yaradır. İndiki müasir texnologiyalar imkan verir ki, kadrdakı ərazinin görüntüsünü, hazır koordinatlarını dəqiqliklə təyin etsinlər. Bu halların qarşısının alınması və gələcəkdə təkrarlanmaması üçün başqa yol qalmır. Çünki şifahi xəbərdarlıqlar nəticə vermir. Aidiyyatı qurumlar isə daha effektiv nəticə üçün bu addımı atmalıdır”.

 

Maraqlıdır, bəs həmin şəxslər hərbiyə yenidən qatıla bilərmi, yoxsa ordudan uzaqlaşdırma ömürlükdür? Ekspertin sözlərinə görə ordunun və dövlətin maraqlarına zidd fəaliyyəti olan hər hansı bir şəxsin sonradan orduya bərpası məqsədəuyğun deyil.

 

“Bu şəxslərin hərbiyə bərpası qətiyyən mümkün deyil. Çünki onlar cinayət işinin açılması ilə ordudan uzaqlaşdırılır”.

 

Bəs belə şəxslərin övladları necə? Onlar da orduda ömürlük iştirak edə bilməz?

 

“Qeyd edim ki, heç bir kəs digərinə görə orduda xidməti məhdudlaşdırıla bilməz. Nə ata oğula, nə də oğul ataya görə heç bir məsuliyyət daşımır”. 

 

Məsələnin hüquqi tərəflərinə gəlicə isə...

 

Hüquq müdafiəçisi Səməd Vəkilovun sözlərinə görə bu cür hallarda Azərbaycan Respublikası Cinayət Məcəlləsinin 284-cü maddəsinə əsasən dövlət sirrini yayma cinayət məsuliyyətinə səbəb olur. 

 

“Hər hansısa şəxs tərəfindən ona etibar edilmiş və ya xidməti vəzifəsinə və yaxud işinə görə ona məlum olan dövlət sirrini təşkil edən məlumatların yayılması, dövlətə xəyanət əlamətləri olmadıqda-üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə üç ildən altı ilədək müddətə azadlıqdan məhrum etmə ilə cəzalandırılır. Eyni əməllər ağır nəticələrə səbəb olduqda-üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə dörd ildən səkkiz ilədək müddətə azadlıqdan məhrum etmə ilə cəzalandırılır. Vəzifədən azad etmə də cinayət qanunvericiliyinə əsasən cəzanın bir növüdür. Odur ki, həmin şəxslər barəsində belə tədbir görülməsi tamamilə qanuna uyğundur”.

 

Odur ki, ordumuza aid video, şəkil və ya digər bəlli olan məlumatlar paylaşılmamalıdır. Unutmayın ki, sizin böyük həvəslə çəkib sosial şəbəkə hesabınızda paylaşdığınız fotolar, videogörüntülər birmənalı şəkildə hərbi sirrin, məxfiçiliyin qorunmamasına və ölkənin informasiya təhlükəsizliyinin pozulmasına xidmət edir. Əks halda nə olacağı bəllidir, çünki qarşı tərəf düşməndir.

 

Ləman Abbaslı

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary