Bu gün Xalq artisti Afaq Bəşirqızının doğum günüdür. 67 yaşını qeyd edən sənətkar bu özəl gününü onu tanıyan insanlarla, doğmaları və dostlarının əhatəsində keçirdiyi deyir.

Xalq artisti ömrünün müdrik çağında izləyiciləri istədiyi qədər güldürə, eyni zamanda düşündürə bilirmi sualına cavab olaraq bildirib ki, ”bunu yalnız tamaşaçı deyə bilər, zənnimcə bacarıram”

Aktrisamız ad günündə həyatını həsr etdiyi mədəniyyətimizə yaradıcılıq arzularını da dilə gətirdi. Kino və teartımız üçün tamaşaçı zövqünü oxşayan əsərlər yazılmasını, sanballı ssenariləri olan filmlərin çəkilməsini arzuladı.

Biz də dəyərli Xalq artistimizi təbrik edib, izləyicilərinə bəxş etdiyi təbəssümün üzündən heç zaman əskik olmamasını arzulayırıq.

Haşiyə: Afaq Bəşir qızı Səfərova 15 avqust 1955-ci ildə Bakı şəhərində Azərbaycanın sevilən aktyoru Bəşir Səfəroğlunun ailəsində anadan olub. 

1962-ci ildə 31 saylı orta məktəbin 1-ci sinifinə gedib və 1972-ci ildə 20 saylı orta məktəbi bitirib. Sənədlərini BDU-nun Şərqşünaslıq fakültəsinə verib, lakin müsabiqədən keçməyib.

Bir müddət Tibb işçiləri Mədəniyyət evinin dram dərnəyinə gedib. 1974-1979-cu illərdə Azərbaycan Dövlət İncəsənət İnstitutunda təhsil alıb. Aktrisalıq fəaliyyətinə 1973-cü ildə Lənkəran Dövlət Dram Teatrında başlayıb. İlk rollarından özünü istedadlı, işgüzar, səhnəyə böyük məhəbbətlə bağlı, daim axtarışda olan sənətkar kimi göstərərək tamaşaçıların dərin rəğbətini qazanıb. 1975-ci ildə Sumqayıt Dövlət Dram Teatrına dəvət alan aktrisa 1989-cu ilə qədər burada çalışıb. Sumqayıt teatrında klassik və müasir dramaturqların əsərlərində baş rolları ifa edərək şöhrət qazanıb. Onun "Bəxt üzüyü" tamaşasında yaratdığı Söylü obrazı öz koloritinə, tutumuna, yüksək bədii keyfiyyətlərinə görə nümunədir. Mədəniyyət Nazirliyi tərəfindən Azərbaycan Dövlət Musiqili Komediya Teatrına (indiki Azərbaycan Dövlət Musiqili Teatrı) göndərilən Afaq Bəşirqızı bugünə kimi həmin teatrda çalışır.

O, uzun illər Mədəniyyət və İncəsənət Universitetində pedoqoq kimi çalışıb və həmin Universitetin professor elmi adına layiq görülüb.

Afaq Bəşirqızının Azərbaycan teatr sənətinin və kinematoqrafiyasının inkişafındakı xidmətlərinə görə hər zaman dövlət tərəfindən yüksək qiymətləndirilib, 17 may 1989-cu ildə Azərbaycan SSR əməkdar artisti, 1993-cü ildə Azərbaycan Respublikasının Xalq artisti fəxri adlarına, 1993-cü ildə və 2003-cü ildə "Qızıl Dərviş" mükafatına layiq görülüb. 2013-cü ildə "Şöhrət” ordeni, 2015-ci ildə Azərbaycan Respublikası Prezidentinin fərdi təqaüdü, eləcə də "Azərbaycan Respublikası Prezidentinin fəxri diplomu" ilə təltif edilib.

Qeyd edək ki, Afaq xanım ailəlidir, Səmral adlı bir oğlu, Bəşir və Əhmədpaşa adlı 2 nəvəsi var.

Gülnar Səlimova