Sosial Tədqiqatlar Mərkəzinin İdarə Heyətinin sədri, deputat Zahid Oruc Beynəlxalq Avrasiya Mətbuat Fondunun Prezidenti Umud Mirzəyevə təşkilatın 30 illiyi ilə bağlı təbrik məktubu ünvanlayıb.
Məktubda deyilir:
“Rəhbəri və qurucusu olduğunuz Beynəlxalq Avrasiya Mətbuat Fondunun yaradılmasının 30 ilinin tamam olması münasibəti ilə Sizi və Sizin şəxsinizdə fondun bütün təsisçilərini, əməkdaşlarını Sosial Tədqiqatlar Mərkəzi adından və öz adımdan təbrik edirəm. Rəhbərlik etdiyiniz beynəlxalq statuslu qeyri-hökümət təşkilatı ölkəmizin və xalqımızın həyatında mürəkkəb və çətin olan bir dövrdə - 1992-ci ildə təsis olunub. Sizi və bu təşkilatı təsis edən digər jurnalist və ziyalıların əsas məqsədi xalqımızın düçar olduğu ağır vəziyyətdə onlara, bütövlükdə ölkəmizə mümkün olan yardımı etmək, Azərbaycan ətrafında yaradılan informasiya blokadasını yararaq həqiqətləri dünya ictimaiyyətinə çatdırmaqdır.
Ötən 30 il ərzində rəhbəri və qurucusu olduğunuz təşkilat minimum resurslarla maksimum nəticələr əldə edərək bu gün ölkəmizin ən qabaqcıl bir qeyri-hökümət təşkilatına çevrilib. Rəhbərlik etdiyiniz qurum bu gün Azərbaycanın beynəlxalq miqyasda layiqincə təmsil edir. Beynəlxalq Avrasiya Mətbuat Fondu BMT-nin İqtisadi və Sosial Şurası (ECOSOC) QHT bölməsinin xüsusi məşvərətçi statuslu üzvüdür. Təşkilat qlobal səviyyədə fəaliyyət göstərən onlarla beynəlxalq qurumlarla, o cümlədən beynəlxalq qeyri-hökümət təşkilatları ilə sıx əməkdaşlıq edir və milli maraqlarımızın beynəlxalq səviyyədə qorunmaslna mühüm töhfələr verir.
Ümid edirik ki, bundan sonra da Beynəlxalq Avrasiya Mətbuat Fondu özünün flaqman statusunu qoruyub saxlamaqla həm ölkəmizdə, həm də onun hüdudlarından kənarda mühüm layihələrə imza atacaq, Azərbaycanın daha da çiçəklənməsi naminə fəaliyyətini davam etdirəcəkdir. Sizə yorulmaz fəaliyyətinizdə uğurlar arzu edirik”.
Qeyd edək ki, Beynəlxalq Avraiya Mətbuat Fondu 1992-ci il sentyabrın 4-də yaradılıb.
O, həmçinin, bu barədə şəxsi facebook hesabında da paylaşım edib.