“Ermənistanı təxribatlara sövq edən birbaşa Rusiya və Qərbdir. Hər ikisi Ermənistanın yaramaz mövqeyini dəstəkləyir”.
Bu sözləri Ednews-a politoloq Zərdüşt Əlizadə Ermənistan-Azərbaycan sərhədində baş verən son hadisələrin səbəblərini şərh edərkən billdirib.
Söhbət zamanı o, qeyd edib ki, 44 günlük Vətən müharibəsindən sonra Ermənistan məğlub tərəf kimi üzərinə düşən öhdəlikləri yerinə yetirmək istəmir.
“Hazırda Ermənistan hakimiyyəti çalışır ki, üçtərəfli bəyanatlara əsasən üzərinə düşən öhdəlikləri yerinə yetirməkdən boyun qaçırsın, mövcud status-kvonu uzunmüddətə dondurub saxlasın. Azərbaycan hakimiyyəti isə tələb edir ki, İrəvan mütləq şəkildə öhdəliklərini yerinə yetirməli, yəni tərəf kimi sərhədlərin delimitasiya prosesində, sülh müqaviləsinin hazırlanmasında və kommunikasiyaların açılmasında fəal iştirak etməlidir. Ermənistan isə bunlara əməl etmək istəmir. Çox təəssüflər olsun ki, Rusiya və Qərb də Ermənistanın bu mövqeyinə müsbət yanaşır”.
Sərhəddə erməni təxribatlarının arxasında rəsmi Kremlin dayanması ilə bağlı iddialara münasibət bildirən politoloq hesab edir ki, münaqişəni yaradan, onu inkişaf etdirən və qaynar nöqtəyə çıxardan məhz elə Rusiyadır.
“Münaqişə Ermənistan və Azərbaycanın Rusiyanın təsir dairəsində saxlanılması üçün münasib bir vasitədir. Bəli, 44 günlük müharibədən sonra hər iki dövlətin qüvvələr nisbəti və hərbi mövqeləri dəyişib. Amma Rusiya, ümumilikdə bölgədə sabitliyin və sülhün bərqərar olunmamasının və müəyyən qarşıdurmaların saxlanılmasının tərəfdarıdır. Belə halda Bakı və İrəvan davamlı olaraq Rusiyadan asılı vəziyyətə qalacaq”.
Politoloq sözlərinə davam edərək fikirlərini belə izah edib:“Qərbə gəlincə isə o da öz çömçəsini qaynar qazana salıb bulamaq istəyir. ABŞ və Avropa da regionda öz maraqlarını güdür. Bir məqamı da nəzərinizə çatdırım ki, azı 200 il ərzində ermənilər Qərbin Yaxın Şərqdə apardıqları siyasətin fəal və təsirli amillərdən biri olub. Bu səbəblərə görə, Qərb ermənilərin arxasında durur”.
ABŞ Dövlət Katibi Entoni Blinkenin Rusiyanın dünyanın diqqətini Ukraynadan yayındırmaq üçün Ermənistan və Azərbaycan arasında qarşıdurma salmasında ittihamlarına toxunan. Z.Əlizadə bu kimi iddiaları doğru hesab etməyib.
“Azərbaycan və Ermənistan elə vacib dövlətlər deyil ki, onlar arasında olan qarşıdurma Rusiyanın Ukraynada müharibəsinə olan marağı azaltsın. Dünyanın diqqəti daim Ukraynadadır və bundan sonra da belə olacaq”.
Yunis Abdullayev