Yeni tədris ilinin başlaması ilə əlaqədar olaraq nəqliyyatda olan sıxlıq artıb. Sıxlığın artmasına baxmayaraq sürücülərin əksəriyyəti adətən ictimai nəqliyyatdakı havalandırma sistemini söndürürlər. Bu isə sürücülərlə sərnişinlər arasında mübahisəyə, ictimai nəqliyyatdan istifadə edənlərin narazılığına səbəb olur. Bunun səbəbi kimi isə sürücülər tapşırığın onlara yanacağa qənaət etmək məqsədi ilə rəhbərlik tərəfindən verildiyini bildirirlər.
Havalandırmadakı qanunsuzluq...
Məsələ ilə bağlı nəqliyyat məsələləri üzrə ekspert Aslan Əsədov Ednews-a açıqlamasında bu cür tapşırıqların qeyri-qanuni olduğunu bildirib.
“Qapalı məkanlarda havalandırma sisteminin söndürülməsi qanunsuzdur. Çünki, dövlət rəsmi olaraq payız rejiminə keçməyib. Havanın necə olmasından asılı olmayaraq, dövlət havalandırma sistemindən istifadə normasını xüsusi olaraq fəsillərə uyğun tənzimləyir. Ümumiyyətlə, qapalı yerlərdə hər zaman havalandırma sistemi aktiv vəziyyətdə olmalıdır”.
Ekspert sürücülərin iddialarını da cavabsız qoymayıb. O, bildirib ki, adətən havalandırma sisteminin rəhbərlik tərəfindən məhdudiyyətlər qoyulduğu bildirirlir.
“Şirkətlər daha çox bunu ekoloji cəhətdən deyil, yanacağın qiymətini nəzərə alaraq tələb edirlər”.
BNA-nın ya imkanları məhduddur...
Məsələyə həmçinin nəqliyyat eksperti Elməddin Muradlı da fikir bildirib. O, bu kimi qüsurların Bakı Nəqliyyat Agentliyi tərəfindən aradan qaldırılmalı olduğunu deyib.
“Təəssüflər olsun ki, BNA-nın ya imkanları məhduddur, ya da, ümumiyyətlə, məsələyə nəzarət edə bilmir. Çünki bu cür nöqsanları, siz jurnalistlər, vətəndaşlar bilirsə, agentliyin əməkdaşları daha yaxşı bilməli və aradan qaldırmalıdırlar. Agentlik bəzən mövcud vəziyyətdən xəbərdar olsa da, sırf müraciətdən sonra məsələyə müdaxilə etməyi gözləyir”.
Elməddin Muradlı havalandırma məsələsi ilə bağlı konkret qərar verilməsinin vacibliyini də vurğulayıb.
“Avtobuslarda havalandırılma ilə əlaqədar olaraq konkret qaydalar müəyyənləşdirilməlidir. Havalandırma sistemi hansı halda aktiv vəziyyətdə, hansı halda deaktiv vəziyyətdə saxlanılmalıdır deyə konkret fikir bildirilməlidir. Düşünürəm ki, bu olsa, sərnişinlərlə sürücülər arasında nizam-intizam beləcə təmin edilə bilər”.
Tibb üzrə elmlər doktoru, professoru Adil Qeybulla, havalandırma sistemi deaktiv olan nəqliyyatların insanlarda oksigen çatışmazlığına səbəb olduğunu bildirib.
“Ümumiyyətlə, ictimai nəqliyyatdan çox sıxlıq olduğu təqdirdə istifadə etmək düzgün deyil. İmmuniteti zəif olan insanlarda bu huşunu itirməsinə gətirib çıxarır. Bu sistem, həmçinin içəridəki oksigen təminatını da tənzimləyir”.
Ekspert həmçinin pandemiyanın hələ bitmədiyini və bizim karantin rejimindən yeni çıxdığımızı da xatırladıb.
“Nəzərə alaq ki, biz pandemiya təcrübəsindən yeni çıxmışıq. Soyuqdəyməsi, yaxud xəstə olan bir kəs ictimai nəqliyyata mindiyi zaman asanlıqla onu digərlərinə yoluxdura bilər. Havalandırma sistemi işləməyən avtobuslarda isə bu hallar daha tez baş verə bilər”.
Məsələnin rəsmi tərəfini öyrənmək üçün ilk olaraq, Bakı Nəqliyyat Agentliyinə müraciət etdik. Qurumun mətbuat xidmətinin rəhbəri Mais Ağayev bildirdi ki, avtobusların havalandırma sisteminin fəaliyyətinin nəzarəti onların səlahiyyətində deyil. Bununla bağlı sərnişindaşıma fəaliyyəti göstərən daşıyıcı şirkətlərə müraciət etməyimizi tövsiyyə etdi. “Xalid Faiqoğlu MMC”nin şirkətinin ictimaiyyətə açıq olan telefon nömrəsi işlək vəziyyətdə olmadığı üçün onlarla əlaqə yaratmaq mümkün olmadı. Ancaq ən təəssüf doğurucu məqam isə “BakuBus” şırkətinin mətbuat xidməti Qalib Babayevin göstərdiyi mövqe idi. Qurumun rəsmisi əvvəl yönləndirdiyimiz suallara cavab verəcəyini bildirsə də, sonradan heç bir telefon zəngimizə cavab vermədi. Bu isə qurumun məsələ ilə bağlı mətbuata verəcəyi heç bir cavabın olmadığını bildirir.
Nəzrin Beydiyeva
