Bu gün Bakıda Azərbaycan vətəndaş cəmiyyəti üçün əlamətdar hadisə olaraq Beynəlxalq Avrasiya Mətbuat Fondunun (BAMF) 30 illik yubileyi təntənəli şəkildə qeyd olundu. Demək olar ki, III Respublikamızla həmyaşıd olan BAMF həm də bu 30 ildə dövlətimiz, xalqımız, vətəndaş cəmiyyətinin keçdiyi bu keşməkeşli, bəzən həddindən artıq keçilməz, çətin olan, daha çox yoxuşlu yolda etibarlı yol yoldaşı olub. BAMF ağır doxsanıncı illərdə Azərbaycan həqiqətlərinin dünyaya çatdırılması, köçkün və qaçqınlarımızın ağır-acısının azaldılması istiqamətində böyük miqyaslı işlər həyata keçirib, humanitar fəaliyyətlərlə on minlərlə insanı əhatə edib, eyni zamanda minatəmizləmə işlərinin həyata keçirilməsinin əsasını qoyaraq böyük töhfə verib.
Beynəlxalq Sülh Bürosunun (BSB), Beynəlxalq Mətbuat İnstitutunun (BMİ), Qaçqınlar və Sığınacaq Axtaranlar üzrə Avropa Şurasının (ECRE), ABŞ Dövlət Departamenti Hərbi-Siyasi İşlər Bürosu Silahların Ləğvi və Qadağan Edilməsi İdarəsinin İctimai-Özəl Tərəfdaşlıq Proqramının, BMT-nin İqtisadi və Sosial Şurası (ECOSOC) QHT bölməsinin xüsusi məşvərətçi statuslu üzvü olan BAMF beynəlxalq forum və tribunalarda Azərbaycanın haqq səsinə çevrilib. BAMF Qarabağ problemini, Ermənistanın Azərbaycana qarşı apardığı işğalçılıq müharibəsinin dəhşətlərini, qaçqınların və məcburi köçkünlərin üzləşdikləri məşəqqətləri əks etdirən xeyli kitab, broşüra və buklet çap etmiş, sənədli filmlərin, videomaterialların hazırlanmasında yaxından iştirak etmişdir. Azərbaycan haqqında obyektiv informasiyaların toplanıb dünya ictimaiyyətinin diqqətinə çatdırılması məqsədilə BAMF on ildən artıq bir müddət ərzində dünyanın ayrı-ayrı ölkələrrindən jurnalistlərin, ziyalıların, xalq diplomatlarının münaqişə bölgələrinə ardıcıl səfərini təşkil etmişdir.
Bir sözlə BAMF media və vətəndaş cəmiyyətinin inkişafı, sülhməramlı aksiyalar və konfliktologiya, qaçqınlar, məcburi köçkünlər və icma problemləri istiqamətlərində ölkəmiz, cəmiyyətimiz, vətəndaşımız və dövlətimiz üçün yorulmadan çalışmış və çalışmaqda davam etməkdədir. BAMF vətəndaş cəmiyyətimiz üçün yaxşı nümunələr, innovasiyalar yaratmaqla da dəyərlərimizə dəyər qatır və yeni baxış formalaşdırır.
BAMF rəhbəri, əziz dostumuz, həmkarımız Umud Mirzəyevi, onun rəhbərlik etdiyi kollektivi Azərbaycan Açıq Hökumət Platforması adından təşkilatın 30 illik yubileyi münasibətilə təbrik edirik və yenu uğurlar arzulayırıq. Umud müəllimin cəmiyyətimizə, dövlətimizə çox töhfələri olub, lakin onların ən əhəmiyyətlisi məhz BAMF kimi təşkilatı qurmasıdır. Onun enerjisi, yaradıcılığı, əzmkarlığı, insanlara, dövlətə sevgisi BAMF üçün ən böyük resurs olub. BAMF-ın fəaliyyəti, naliyyətləri vətəndaş cəmiyyəti tariximizin ən önəmli hissələrindən biridir və əminəm ki, Fond hələ çox töhfələr verəcək, gəncləri də yeni uğurlara ruhlandırmaqda davam edəcəkdir. BAMF Azərbaycan Açıq Hökumət Platformasının aparıcı üzvlərindən biri kimi töhfələrini əsirgəmir və hər zaman nümunə kimi göstərməkdən qürur duyuruq.
Əliməmməd Nuriyev
Azərbaycan Açıq Hökumət Platformasının koordinatoru