Xəbər verdiyimiz kimi, oktyabrın 14-də Bakıda Beynəlxalq Avrasiya Mətbuat Fondunun (BAMF) 30 illik yubileyi münasibətilə tədbir keçirilib.
Ednews xəbər verir ki, tədbirdə BAMF-ın Müşahidə Şurasının sədri Çingiz Abdullayev, Azərbaycan Respublikası Prezidentinin Administrasiyasının Qeyri-hökumət təşkilatları ilə iş və kommunikasiya şöbəsinin müdir müavini Səadət Yusifova, Beynəlxalq Türk Mədəniyyəti və İrsi Fondunun prezidenti Günay Əfəndiyeva, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Azərbaycan Respublikasının Minatəmizləmə Agentliyinin (ANAMA) İdarə Heyətinin sədri Vüqar Süleymanov, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva çıxış ediblər.
Aygün Əliyeva çıxışında BAMF-ı 30 illik yubiley münasibəti ilə təbrik edib. Fondun Azərbaycanda vətəndaş cəmiyyətinin inkişafı, Azərbaycanın haqlı mövqeyinin beynəlxalq təşkilatlarda müdafiəsi, qaçqın və məcburi köçkünlərin problemlərinin həllinə dəstəyin göstərilməsi kimi fəaliyyətləri yüksək qiymətləndirib.
Sonda A.Əliyeva Fondun Prezidenti Umud Mirzəyevi təltif edib.
Xatırladaq ki, Beynəlxalq Avrasiya Mətbuat Fondunun yaradılmasının 30 ili tamam olur. Fond 1992-ci ildə müstəqil qeyri-hökumət təşkilatı kimi yaradılıb, Azərbaycanda QHT-lər haqqında qanuna uyğun olaraq dövlət qeydiyyatından keçib.
