Beynəlxalq Avrasiya Mətbuat Fondunun (BAMF) 30 illik yubileyi münasibətilə keçirilən tədbir haqqında geniş məqalə dərc olunub.
Ednews həmin məqaləni təqdim edir:
Dünya hamımızındır
“Ömür yolunu” sülh naminə fəaliyyətə həsr edən Beynəlxalq Avrasiya Mətbuat Fondunun 30 illik yubileyi qeyd olunub
Oktyabrın 14-də “Hilton” hotelində Beynəlxalq Avrasiya Mətbuat Fondunun (BAMF) 30 illik yubileyi ilə bağlı tədbir keçirilib.
Əvvəlcə Azərbaycan Respublikasının Dövlət Himni səsləndirilib. Daha sonra torpaqlarımızın bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad olunub.
Tədbiri salamlama nitqi ilə açan BAMF-ın prezidenti Umud Mirzəyev bildirib: “Bu gün tədbirə tanınmış insanlar, beynəlxalq təşkilatların nümayəndələri, xarici ölkələrdən qonaqlar, dövlət xadimləri, media təmsilçiləri qatılıblar. Hər birinizi burada görməkdən məmnunam.”
Umud Mirzəyev qeyd edib ki, Beynəlxalq Avrasiya Mətbuat Fondu 1992-ci ildə yaradılıb və BMT-nin Sosial İqtisadi Şurasının (ECOSOC) Əsas Məşvərətçi Statuslu üzvü olan beynəlxalq qeyri-hökumət təşkilatıdır: “Otuz il az bir dövr deyil. Fondun 30 illik fəaliyyətində çox böyük zəhmət var. BAMF media və vətəndaş cəmiyyətinin inkişafı, qaçqın və məcburi köçkünlərin problemləri, sülh quruculuğu və münaqişələrin həlli, icmaların inkişafı və təhsil istiqamətlərində proqramlar həyata keçirir. Beynəlxalq təşkilatlarla geniş əməkdaşlıq gündəliyinə malik olan Fond daim humanitar proseslərin fəal iştirakçısı olmaqla, Azərbaycan həqiqətlərinin dünya ictimaiyyətinə çatdırılmasında da önəmli işlər aparır.”
Daha sonra çıxış edən BAMF-ın Müşahidə Şurasının sədri, Xalq yazıçısı Çingiz Abdullayev yubileylə bağlı fikirlərini söyləyib: “BAMF beynəlxalq aləmdə sülhün və ədalətin tərəqqisi, medianın və vətəndaş cəmiyyətinin inkişafı, milli maraqlarımızın qorunması, ərazi bütövlüyümüzün təmin edilməsi naminə Azərbaycan həqiqətlərinin dünya ictimaiyyətinə çatdırılması istiqamətində bu otuz ildə böyük və əvəzsiz işlər görüb.”
Tədbirin davamında BAMF-ın 30 illiyini əks etdirən sənədli film təqdim edilib.
Tədbirdə çıxış edən Azərbaycan Respublikası Prezidentinin Administrasiyasının Qeyri-hökumət təşkilatları ilə iş və kommunikasiya şöbəsinin müdir müavini Səadət Yusifova ölkəmizin QHT sektorunda 30 il fasiləsiz fəaliyyət göstərən, çoxsaylı layihələri ilə respublikamızın müxtəlif regionlarında və xaricdə nəcib işlər görən Fondun kollektivini təbrik edib.
Ölkəmizdə QHT-lərə dövlət dəstəyi, dövlət-QHT əməkdaşlığına aid kifayət qədər nümunələrin olduğunu qeyd edən S.Yusifova diqqətə çatdırıb ki, bu əməkdaşlığın ən bariz nümunələrindən biri elə məhz Beynəlxalq Avrasiya Mətbuat Fondudur: “Beynəlxalq Avrasiya Mətbuat Fondu Qarabağ probleminin həlli, bu sahədə medianın rolu və s. istiqamətlərdə 30 illik ənənəsi, iş təcrübəsi olan, ölkəmizdə və xaricdə öz fəaliyyəti ilə hörmət və nüfuz qazanan təşkilatlardan biridir. Təsadüfi deyil ki, 30 il bundan əvvəl olduğu kimi, bu gün də Fondun fəaliyyətində humanitar aspekt üstünlük təşkil edir. Beynəlxalq Avrasiya Mətbuat Fondu 30 il ərzində təmas xəttində, 44 günlük Vətən müharibəsi bitdikdən sonra işğaldan azad edilmiş ərazilərdə minalar və partlamamış hərbi sursatların təmizlənməsi istiqamətində maarifçilik işləri aparır. Fond Azərbaycanda azsaylı təşkilatlardandır ki, həm beynəlxalq təşkilatlarda, həm də mətbuatda eyni qaydada böyük uğurlara imza atıb. Fondun artıq yerli təşkilatdan daha geniş bir coğrafiyanı əhatə edə biləcək, regional və ya beynəlxalq təşkilata çevrilməsi üçün böyük potensialı var.”
Tədbirdə BMT-nin Azərbaycan üzrə resident əlaqələndiricisinin əvəzi Quido Ambroso, “Əl-Cəzirə” Media Şəbəkəsinin Baş direktoru Mustafa Souag, Beynəlxalq Türk Mədəniyyəti və İrsi Fondunun prezidenti Günay Əfəndiyeva, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Azərbaycan Respublikasının Minalardan Təmizləmə Agentliyinin (ANAMA) İdarə Heyətinin sədri Vüqar Süleymanov, BMT-nin QHT bölməsinin sabiq rəhbəri Andrey Abramov, Türkiyə-Avropa Jurnalistlər Birliyinin sədri Adnan Fişenk, Qeyri-Hökumət Təşkilatlarına Dövlət Dəstəyi Agentliyinin İcraçı direktoru Aygün Əliyeva, Beynəlxalq Reytinq Mərkəzinin baş konsulu Aleksandr Rabinoviç və başqaları çıxış edərək Beynəlxalq Avrasiya Mətbuat Fondunun yaradılmasının 30 illiyi ilə bağlı BAMF-ın kollektivini təbrik ediblər. Diqqətə çatdırıblar ki, təşkilat bu illər ərzində ölkəmizdə media və vətəndaş cəmiyyətinin inkişafı, qaçqın və məcburi köçkünlərin problemləri, sülh quruculuğu va münaqişələrin həlli, icmaların inkişafı və təhsil istiqamətlərində böyük işlər görüb. Eyni zamanda, BAMF-ın beynəlxalq qurumlarla, habelə BMT ilə əlaqələri və QHT kimi uğurlu və geniş fəaliyyət göstərməsi də təqdirəlayiqdir.
Tədbirdə Nobel mükafatı laureatı, professor Məhəmməd Yunusin, Birləşmiş Millətlər Təşkilatının Cenevrə ofisinin baş direktoru David Chikvaidzenin, eyni zamanda, “Sülhün Kökləri” təşkilatının qurucusu Heidi Kuhnun BAMF-ın yubileyi ilə bağlı təbrik mesajları video-formatda nümayiş olunub.
Çıxış edən Azərbaycan Mətbuat Şurasının sədri Rəşad Məcid bildirib ki, BAMF mənim üçün doğma təşkilatdır: “30 il əvvəl Beynəlxalq Avrasiya Mətbuat Fondunun yaradılmasına şəxsən şahidlik etmişəm. O zamanlar, yəni 1992-ci il çox gərgin bir dövr idi. Umud Mirzəyev dünyanın müxtəlif ölkələrindən olan jurnalistləri Azərbaycana dəvət edirdi. O, Almaniyadan və digər xarici ölkələrdən olan media nümayəndələrini Füzuliyə, digər cəbhə bölgələrinə aparırdı.”
Rəşad Məcid, həmçinin BAMF-ın bugünkü uğurlarının 30 illik böyük bir zəhmətin nəticəsi olduğunu da vurğulayıb: “Təşkilat bu illər ərzində Azərbaycan mətbuatının inkişafında böyük işlər görüb. Media təlimlərinin keçirilməsi, beynəlxalq qurumların informasiya kanallları, “Əl-Cəzirə” kimi məşhur media şəbəkəsinin Azərbaycana gətirilməsi, regiondan verilişlər, çəkilişlər etmək heç də hər quruma müəssər olan uğur deyil. Eyni zamanda BAMF-ın beynəlxalq qurumlarla, habelə BMT ilə əlaqələri və QHT kimi uğurlu və geniş fəaliyyə göstərməyi də təqdirəlayiqdir. Mən Umud müəllimin tükənməz enerjisinin, vətənpərvərliyinin, dönməz və əzmkar mübarizəsinin dəfələrlə şahidi olmuşam”.
Mətbuat Şurasının sədri qeyd edib ki, bu gün Beynəlxalq Avrasiya Mətbuat Fondu 30 yaşını qürurla, fəxrlə qeyd etməyə layiqdir: “Umud Mirzəyev uzun illər Mətbuat Şurasının İdarə Heyətinin üzvü, sədr müavini olub. Onun Şuradakı fəaliyyəti də böyük hörmətə layiqdir. Azərbaycan Mətbuat Şurası BAMF-ın 30 yaşı münasibətilə BMT-də daxil, bir çox nüfuzlu beynəlxalq təşkilatlarda Azərbaycanın milli maraqlarını layiqincə qoruduğuna, ölkəmizdə peşəkar media standartlarının tətbiqi istiqamətində səmərəli fəaliyyətinə görə qurumu diplomla təltif edir. Diplomu şəxsən hörmətli Umud müəllimə təqdim etmək istəyirəm. BAMF-da əməyi keçən hər kəsə təşəkkür edir və onları təbrik edirəm”.
Tədbir zamanı Beynəlxalq Avrasiya Mətbuat Fondu ilə “Əl-Cəzirə” Media Şəbəkəsi və Beynəlxalq Türk Mədəniyyət İrsi Fondu arasında Əməkdaşlıq memorandumları imzalanıb.
Sonda tanınmış xanəndə, Əməkdar artist, BAMF-ın mədəniyyət elçisi Qoçaq Əsgərov bir-birindən gözəl ifaları ilə tədbir iştirakçılarına gözəl əhval-ruhiyyə bəxş edib.
Yaqut Ağaşahqızı, “İki sahil”
