“Bələdiyyələrin öz büdcəsini təşkil etməsi üçün maliyyə imkanları yoxdur”.

Bu sözləri Ednews-a Milli Məclisin deputatı, Milli Cəbhə Partiyasının sədri Razi Nurulluyev Azərbaycanda bələdiyyələrin əhalinin sosial təminatında rolunu şərh edərkən bildirib.

Deputatın sözlərinə görə, bələdiyyələr azad fəaliyyət göstərə bilmirlər. Hər bir rayonda icra hakimiyyəti orqanları daha güclüdür.

“Bələdiyyələr onlarla heç cürə rəqabət apara bilməz. Belə olan halda məcbur olub icra orqanlarının bir qolu kimi fəaliyyət göstərirlər. Halbuki, onlara qanunvericilik səviyyəsində sərbəst imkanlar və hüquqlar verilib. Təəssüf ki, öz fəaliyyətlərini bu istiqamətdə yürüdə bilmirlər”. 

Deputat bələdiyyələrin strukturlarında kadr problemlərinin olduğunu da qeyd edib.

“Bələdiyyələrdə kadr potensialı o qədər də ürəkaçan deyil. Bələdiyyə sədri daxil olmaqla qurumun üzvləri bir çox sahələr üzrə geniş bilik və bacarıqlara malik olmalıdırlar. Ona görə ki, onların çoxusu hələ də qanunla təsdiqlənən öz hüquqları və imkanlarından istifadə etməyi bacara bilmirlər. Bələdiyyə strukturunda fəaliyyət göstərən şəxslər münasib investisiyaların cəlb olunması, banklardan kreditlərin götürülməsi, biznes və özünəməşğulluğun təşkil edilməsi istiqamətlərində təqdirəlayiq işlər və tədbirlər görməlidirlər. Bölgələrdə özəl sektorların açılması və onların fəaliyyət göstərməsi üçün bələdiyyələrin səriştələri olduqca vacibdir.

Demək olar bələdiyyələrin bir çox hüquqları əllərindən alınıb, vergi yığmaq imkanları məhdudlaşdırılıb. Bu səbəblərə görə, onlar inkişaf edə bilmirlər, sosial məsələlərdə öz sözlərini deyə bilmirlər”.

Sonda R.Nurulluyev bələdiyyələrin əhalinin sosial təminatı və digər istiqamətlərdə səlahiyyətlərinin artırılmasını zəruri hesab edib.

“Bir çox xarici ölkələrdə regionaların inkişafı və yerli sakinlərin sosial problemlərinin həll olunması ilə bələdiyyələr məşğul olur. Bələdiyyələr bölgələrdə mütləq sosialyönümlü proqramlar icra etməlidirlər. Bunun üçün onlara şərait də yaradılmalıdır. Eyni zamanda hesab edirəm ki, rayonlarda bütün vergilər  bələdiyyələr tərəfindən yığılmalıdır. Çünki vergilərdən, eləcə də bəzi resurslardan əldə olunan vəsaitlər regional inkişafa, quruculuğa və sosial təhlükəsizliyin təmin olunmasına yatırıla bilər”.

Xatırladaq ki, bir müddət əvvəl deputat Fazil Mustafa bildirmişdi ki, ölkədə bələdiyyə fəaliyyəti yoxdur, heç bir səlahiyyəti olmayan qurum statusundadırlar.

Yunis Abdullayev