Son bir neçə həftədir, Azərbaycanda çoxmərtəbəli binalarında partlayış hadisələrinin baş verməsi ilə bağlı xəbərlərdə artım müşahidə edilir. Təəssüf ki, binalar partlamaqla qalmır, həmçinin sakinlərin ölümü və ya ağır xəsarəti ilə nəticələnir.

Xırdalanda baş verən partlayış hadisəsi də üç nəfərin ağır yaralanmasına səbəb oldu. 

Maraqlıdır ki, binaların təhlükəsizliyinə kim nəzarət edir? Bu kimi hadisələrin qarşısını almaq üçün hansı tədbirlər görülməlidir?

Məsələ ilə bağlı təhlükəsizlik üzrə ekspert Elmar Nurəliyev Ednews-a danışarkən qeyd edib ki, çoxmərtəbəli binalar inşa ediləndə bütün lazım olan təhlükəsizlik normaları və standartlar nəzərə alınmalıdır.

“Binaların təhlükəsizlik məsələləri onun tabe olduğu qurumdan asılıdır. Qurum baş verə biləcək təhlükələrin qarşısını almaq üçün tədbirlər görməlidir. Son zamanlar baş verən partlayışlara nəzər salsaq bütün evlərdə qaz, işıq təsərrüfatında təhlükəsizliklə bağlı tədbirlər alınmalıdır. Qazla düzgün istifadə edilmədikdə natamam yanma nəticəsində dəm qazı əmələ gəlir. Bu da insanların həyatı üçün təhlükə riskidir. İnsanlar qaz təsərrüfatı ilə bağlı təmir işi apararkən, yerdəyişmə edərkən diqqətli olmalıdır. Eyni zamanda qaz cihazı alarkən mütləq yüksək standartlara cavab verən məhsulun olmasına diqqət etmək lazımdır. Cihazların quraşdırılması üçün də sertifikasiyası olan, akkreditiasiyadan keçmiş müəssisələrə müraciət etmək lazımdır. Əfsuslar olsun ki, insanlar heç bir akkreditasiyası olmayan fərdi şəxslərə qaz cihazlarının yerləşdirilməsini həvalə edirlər. Belə olduqda təhlükə riski qaçılmazdır. Evlərdə qaz sızmasının aşkar olunması üçün xüsusi cihazlar var. Bu cihazlar evdə qaz sızması baş verdikdə birbaşa ultrabənövşəyi şüalar vasitəsi ilə siqnal ötürür. Həm qazın istifadəsi dayanır, həm də istifadəçiyə bununla bağlı bildiriş gəlir”.  

Ekspert həmçinin qeyd edib ki, bəzi özəl müəssisələr var ki, fərdi yaşayış məntəqələri bu kimi qurumlara müraciət edərək təhlükəsizlik məsələlərində yoxlanış edə bilərlər.

“Bu vətəndaşların üzərinə düşən bir məsələdir. Binaların hansı komplekslərin balansındadırsa, həmin şirkətlər  binaların ümumi təhlükəsizliyinə, infraksrtukturuna, eyni zamanda generator otaqlarına, qazanxanalara nəzarət etməlidir. Dəfələrlə şahidi oluruq ki, yaşayış binasında lift qırıldı. Burada bina sakinin günahı nədir? Sakinlər binaya aylıq kommunal ödəniş edirsə binaya nəzarət edən qurum da öz üzərinə düşən məsələyə biganə qalmamalıdır”.  

O, son olaraq bildirib ki, binanın ümumi təhlükəsizliyinə aid olduğu şirkət nəzarət edirsə, fərdi evlərdə baş verə biləcək hər hansı məsələyə təhlükəsizlik məsələlərinə orada yaşan ev sakini məsuliyyət daşıyır.  

Ayan Rzayeva