Son vaxtlar dünyada baş verən zəlzələlər bəşəriyyətdə panika, qorxu yaradıb. Təbii fəlakət nəticəsində yüzlərlə insanın evi dağılıb.
Hesablamalara görə dünyada hər il 500000-dən çox zəlzələ baş verir. Bunlardan çoxu cüzi hiss edilir. Məlum olduğu kimi zəlzələlər 12 ballıq şkala ilə ölçülür. 7 baldan daha çox gücə malik zəlzələlər əsasən dağıdıcı hesab olunur.
Bu gün səhər saatlarında Azərbaycanda da zəlzələ baş verib. Yeraltı təkanlar Gəncə, Yevlax, Siyəzən və digər yaxın rayonlarda hiss edilib. Azərbaycanda hiss olunan güclü zəlzələnin episentri Dağıstanda Mahaçkaladan 82 km cənub və cənub-qərbdə yerləşib. Zəlzələ Azərbaycan ərazisində sərhəd rayonlarında 3-4 bala qədər hiss olunub.
Bəs, görəsən, Azərbaycan üçün təhlükəli hesab ediləcək zəlzələlər gözlənilirmi?
Ednews bu barədə mütəxəssilərin proqnozlarını öyrənib.
Azərbaycan Milli Elmlər Akademiyasının (AMEA) nəzdində Respublika Seysmoloji Xidmət Mərkəzinin (RSXM) baş direktoru Qurban Yetirmişlinin açıqlamasına görə, Azərbaycanda zəlzələ yaxın günlərdə gözlənilmir. Ancaq hiss edilə biləcək zəlzələlər baş verə bilər.
"Hiss olunanlar 3, 4, 5 baldır. 2021-ci ilə nisbətən bu il seysmislik aşağı səviyyədədir. Zəlzələ elə bir şeydir ki, yerdaxili bir prosesdir və biz bunu hər gün izləyirik. Yaxın günlər üçün elə bir əsas vermir ki, katostrafik zəlzələ baş versin. Amma hər gün hiss edilməyəcək səviyyədə zəlzələlər baş verir".
Ekstranses, parapsxioloq Səbuhi İmanovun sözlərinə görə isə dünyada böyük dəyişikliklər baş verir.
"Dəyişikliklər 2 formada olur: ya bizim törətdiyimiz ya da təbii halda baş verən hadisələr. Yağış, sunami, daşqınlar, sunami həmçinin zəlzələlər təbii fəlakətlərdir. Hazırda insanların törətdiyi mənfi hadisələr artığından böyük dəyişikliklərə səbəb olacaq. Şübhəsiz ki, təbii fəlakətlər də artacaq. Azərbaycanın özündə də olacaq. Hətta zəlzələlərə də aiddir. Azərbaycanda çox dağıntılara səbəb olacaq zəlzələ gözlənilmir, ancaq insanlar arasında panika və qorxu yaradacaq".
Xatırladaq ki, Azərbaycanda ən son güclü zəlzələ 2000-ci il noyabrın 25-də, Bakıda 6,8 bal gücündə (bəzi məlumata görə, 7,9 bal) zəlzələ baş verib. Güclü təkanlar iki dəfə olmaqla 22 saniyə çəkib. Zəlzələ eyni anda Gəncə, Lənkəran və Sumqayıtda da hiss olunub.
Oğuz Ayvaz
