Dünya bazarlarında taxılın qiyməti getdikcə ucuzlaşır. Bu ilin iyun, iyul, avqust aylarında buğdanın qiymətində çox ciddi ucuzlaşma müşahidə olunub. Lakin sözügedən prosesin əksinə ölkədə çörək və digər un məmulatlarının qiymətlərində heç də enmə nəzərə çarpmır. Cari il ərzində Azərbaycanda taxıl məhsullarının qiymətində iki dəfə artım yaşanıb. Dünyada taxılın qiymətində baş verən ucuzlaşma ölkəmizə öz müsbət təsirini göstərəcəkmi?

Bu barədə iqtisadçı Əkrəm Həsənov Ednews-a açıqlama verib:

“Məsələ əslində göründüyü kimi sadə deyil. Bəli, dünyada taxılın qiyməti sabitləşir, amma yenə də Azərbaycanda istehlak olunan çörəyin qiymətindən bahadır. Taxıl və çörək ölkəmizdə mühüm strateji əhəmiyətli məhsul hesab olunur, buna görə də dövlət heç vaxt qiymətlərin kəskin artımına imkan vermir. Rusiya Ukrayna müharibəsi fonunda dünyada taxılın və buğdanın qiymətlərinin kəskin artdığı zamanda bizdə də çörəyin qiyməti qismən artdı. Amma yenə də Avropa və s. ölkələrdəki qiymətlərlə müqayisədə yüksək olduğunu iddia etmək olmaz”.

Ekspert bildirib ki, qiymətlərdə ciddi dəyişikliklərdən söhbət gedə bilməz: 

“Hazırda dünya ölkələri taxıl problemini qismən həll etsələr də ölkəmizdə çörək və un məmulatlarının qiymətlərinin düşəcəyini gözləmək yanlış olardı. Bütövlükdə hər hansısa məhsulun və ya xidmətin qiymətinin düşəcəyi gözlənilmir. Əksinə, növbəti illərdə ödənişlərdə müəyyən artımlar ola bilər. Təəssüf ki, bu da insanların rifahına öz mənfi təsirini göstərəcək”.