Dekabrın 28-də Tarif Şurası dərman vasitələrinin qiymətlərinin tənzimlənməsi barədə qərarı şərh edib. Bildirilib ki, böyük sosial əhəmiyyət kəsb edən dərman vasitələrinin qiymətlərinin tənzimlənməsi prosesi davam etdirilir.
Qiymətlərin tənzimlənmələri ilə dərman vasitələrinin keyfiyyətinin uyğunluğu, ölkədə yaşanan dərman qıtlığı problemi, yerli istehsalın təşviq edilməsi və bütün bunların əhalinin sağlamlığına və maddi rifahına mümkün təsirləri barədə Azad İstehlakçılar Birliyinin sədri Eyyub Hüseynov Ednews-a açıqlama verib:
“Tarif Şurası 3000-dən çox dərmanın qiymətinin tənzimlənməsi istiqamətində işlər görür. Lakin külli-miqdarda dərman preparatı var ki, onların qiyməti hələ də stabil deyil. Aparılan tənzimlənmə isə çox təəssüf ki, manatın dollara olan məzənnəsi nəzərə alınmadan həyata keçirilir. Baxmayaraq ki, ölkədə məzənnə bir neçə ildir ki, stabil qalmaqda davam edir, lakin artım baş versə bunun nəticəsi hər sahədə olduğu kimi dərman vasitələrinin qiymətlərinə də təsirsiz ötüşməyəcək. Qiymətlər tənzimlənsə də dərman preparatlarının keyfiyyətində ciddi şəkildə azalma müşahidə olunur. Ölkədə fəaliyyət göstərən alman aptekləri buna nümunədir. İnsanlar ehtiyacları olan və çətin əldə edilən keyfiyyətli dərmanları qiymətləri digər şəbəkələrdən qat-qat baha olsa da ancaq bu apteklərdə tapa bilirlər, təəssüf ki”.
Eyyub Hüseynov onu da bildirib ki, bütün dünyada keyfiyyətli dərmanla saxta dərmanı fərqləndirmək heç də asan proses deyil, bu, artıq qlobal problemə çevrilib:
“Qiymətlərin tənzimlənməsi məsələsi əhalinin rifahına müsbət təsir göstərən haldır. Lakin bunun fonunda keyfiyyətin aşağı düşməsi də gözləniləndir. Bütün aptek şəbəkələrində dərmanların vahid qiymətlərinin müəyyən edilməsi zəruridir. Bununla belə bir çox dərman preparatları var ki, qonşu Türkiyədə bizdəki qiymətlərdən qat-qat ucuzdur”.
Eyyub Hüseynov Pirallahı Sənaye Parkının fəaliyyətinə də toxunaraq qeyd edib ki, ölkədə keyfiyyətli və münasib qiymətə dərman preparatlarının istehlakı üçün yerli istehsalın inkişaf etdirilməsi şərtdir:
“Yerli dərman istehsalı sahəsində demək olar ki, heç bir irəliləyiş yoxdur. Pirallahı Sənaye Parkı çox böyük imkanlara malikdir və yerli istehsalın canlandırılmasında əhəmiyyətli rolu ola bilər. Lakin, hələ ki, orada primitiv vasitələr istehsal olunur. Dövlətin bu istiqamətdə həyata keçirdiyi siyasət diqqətəlayiqdir və yerli və xarici investorlar cəlb edilməklə dəstəklənməlidir”.
Eyyub Hüseynov onu da bildirib ki, Tarif Şurası tərəfindən aparılan qiymət tənzimlənməsi apteklərdə dərman qıtlığına səbəb ola bilər:
“Bəzən dərman distribüterləri özləri süni qıtlıq yaradırlar və qiymətlər süni şəkildə artır. Cənab Prezidentin də vurğuladığı kimi iqtisadiyyatın bəzi sahələrində kartel sövdələşmələri var ki, bu da qıtlığa, qiymət artımına, eyni zamanda yerli dərman istehsalına da əhəmiyyətli dərəcədə mənfi təsir göstərir. Düşünürəm ki, tənzimləmələr bəzi dərman seqmentlərində qıtlığa gətirib çıxaracaq”.
Qeyd edək ki, Azərbaycan Respublikasının Tarif Şurası dekabrın 28-də dərman vasitələrinin qiymətləri ilə bağlı qərarlar qəbul edilib. Bildirilib ki, dövlət tənzimləməsinin məqsədi iqtisadi əsaslar olmadan qiymətlərin bahalaşmasının qarşısını almaq və optimal qiymətlərin, yəni, əhalinin dərman vasitələri ilə etibarlı təchizatına və sahibkarlıq subyektinin ağlabatan rentabelliyinə imkan verən minimal qiymətlərin tətbiqinə nail olmaqdır.
Törə Zeynallı