Qonşu ölkələrdə - Türkiyə, Gürcüstanda ictimai nəqliyyatdan istifadə edənlər üçün limitli – həftəlik, aylıq və illik kartlar mövcuddur. Bu kartlar vasitəsilə vətəndaşlar rahatlıqla istifadə edərək özlərini bəzi çıxılmaz vəziyyətlərdən sığortalayırlar. Maraqlıdır ki, bizim ölkədə nəqliyyat vasitələrində bu system nə zaman tətbiq oluna bilər?
“Əslində inkişaf etmiş ölkələrdə bu kart sisteminin tətbiqi ilə bağlı müxtəlif yanaşmalar var”.
Bu sözləri Ednews-a açıqlamasında nəqliyyat eksperti Elməddin Muradlı bildirib.
O, qeyd edib ki, burada şəxsi maraqlar olmasa, dövlətin maraqları üstün olsa, vətəndaşlara yaxşı xidmət etmək üçün sistem qura bilsələr bu mümkündür.
“Azərbaycan çox böyük bir ölkə deyil. Haqqında danışdığım ölkələrin bir şəhəri Azərbaycan boydadı. Ona görə bu ölkələrdə vətəndaşlara fərqli kartlar təqdim edirlər. Şirkətlər insanları ictimai nəqliyyata cəlb etmək üçün bonuslar verirlər. Tələbələrə gediş haqqı üçün endirimlər tətbiq edirlər. Avropada həftə sonları ictimai nəqliyyatın qiymətini daha da ucuzlaşdırırlar. Bizdə bir sistem qurublar. Amma bu sistemi təkmilləşdirən yoxdur”.
Onun sözlərinə görə Bakı Kart sistemi də artıq çökmək üzrədir.
“ Bakı kartda Hər gün bir problem yaranır. Terminalların düzgün çalışmamağı buna problem yaradır. Bu qədər maliyyə ayırıb iş qururlar. Sonra ortaya şəxsi maraqlar çıxır. Bakı Kart sistemi hazırda bu vəziyyətdədir. Bir də gördük ki, artıq bütün ictimai nəqliyyatlar nağd ödənişlə çalışacaq. Hələ ki, Bakı Nəqliyyat Agentliyi və bu şirkətlərdə öz maraqlarını həyata keçirməyə çalışan məmurlar sistemi təkmilləşdirməyə o qədər də maraq göstərmirlər”.
Deputat Naqif Həmzəyev isə açıqlamasında bildirib ki, bunu tətbiq etmək hələ mümkün deyil .
“Çünki ictimai nəqliyyat üçün artıq Bakı Kart istifadə olunur. Sadəcə olaraq biz əlavələr edə bilərik. Şəhid ailələrinə, müəllimlərə, tələbələrə müəyyən güzəştlər tətbiq oluna bilər. Yaxud aylıq kartlar təklif oluna bilər. Bu daha ucuz olar. Amma bu hələ ki, təklif olaraq qalır. Düşünürəm ki, növbəti illərdə adiyyatı qurumlar bu təklifləri dəyərləndirə bilərlər. İctimai nəqliyyata maraq daha da artar”.
O qeyd edib ki, insanlar təkcə kart məsələsinə görə, qiymətə görə deyil, həm də yüksək xidmətə görə ictimai nəqliyyata üz tutmalıdır.
“Bunun üçün zaman da lazımdır. Zamanı gələndə bu layihələr də həyata keçiriləcək”.
Ayan Rzayeva