Yeni qərara əsasən 15 fevraldan marketlərdə alıcılara verilən polietilen torbalar ödənişli olacaq. Xarici ölkələrdə uzun illərdir ki, zərərli olduğu üçün bu torbalar mağazalarda ödənişli təklif olunur.
Politelen torbaların satışı ətraf mühitin çirklənməsində təbiətə ziyanı azaldacaqmı? Əgər ziyanlıdırsa, ümumiyyətlə ödənişli yaxud da ödənişsiz vətəndaşlara niyə təklif olunur?
Ekoloq Qorxmaz İbrahimlinin fikrincə politelien torbalar kimyəvi maddələrdən hazırlandığına görə onların istifadəsi sağlamlıq üçün ziyanlıdır.
“İnsanlar bu torbaları ödənişsiz alırlar. Nəticədə aldıqları paketlərə diqqət yetirmədən yerə atırlar. Ətrafın çirklənməsi ilə yanaşı eyni zamanda bu tullantılar həm də dənizə atılır. Nəticədə də dənizdə yaşayan canlıların ölümünə səbəb olur”.
Ekspertin sözlərinə görə, bu tullantıların zərərlərini saymaqla bitməz. Önəmli olan odur ki, bu məhsullar gec çürüyür.
“Bəziləri isə ümumiyyətlə heç çürümür. Alternativ üsul kimi kağız torbalardan istifadə oluna bilər. Çevrəyə heç bir zərərləri yoxdur. Bundan əlavə parça torbalar var. Bu kimi torbaları istifadə etmək həm sərfəli, həm də zərərsizdir”.
Ekoloq bildirir ki, bu torbaların ödənişli satılmasının nə qədər effekt verib-verməməsi də bilinmir.
“Məsələn, Rusiyada 12 il əvvəl politelen torbaların qiyməti ödənişli oldu. Amma buna rəğmən ətraf mühitin kirlənməsində kifayət qədər rol oynayır. Türkiyədə də çevrənin qorunması üçün bu addım atıldı. Bu atılan addımları alqışlayıram”.
O, həmçinin Azərbaycanda kağız torbaların tətbiq olunmasının meşələrə təsirindən də danışıb.
“Məsələn Finlandiya meşə ticarəti ilə məşğul olan ölkədir. Orada hər il qırılan ağacların yerinə yeni ağaclar əkirlər. Bunu tətbiq edərək politelien torbalardan imtina etmək lazımdır”.
Torbalar pulsuz idi…
“Nazirlər Kabinetinin müvafiq qərarına əsasən ticarət,iaşə obyektlətində həmçinin xidmət sahəsi və digər fəaliyyətlə məşğul olan müəssisələr məhsul satışı zamanı malların və məhsulları daşınması üçün istehsalçılara polietilen torbalar təqdim edirdilər və bu torbalar pulsuz idi”.
Bu sözləri Ednews-a açıqlamasında iqtisadçı Günay Hüseynova bildirib. O, bildirib ki, polietilen torbaların ödənişli olmasında əsas məqsəd bu torbalardan istifadəni azaltmaqdır. Onun sözlərinə görə yeni dəyişikliyə əsasən, bu torbalar artıq pullu olacaq və məbləği də mağazalar tərəfindən müəyyən olunacaq.
“Sifarişçi mağaza olduğu üçün tamamilə onların öhdəsinə buraxılıb və satışından öncə alıcılara torbaların pullu olduğu mütləq məlumat veriləcək. Əslində ətraf mühitin mühafizəsi, ekoloji təmizlik baxımından bu qanun çoxdan qəbul edilməli idi. Digər ölkələrdə olduğu kimi daşınmalar üçün bizdə də bez çantalardan istifadə oluna bilər. Bu qanun əslində plastikdən istifadənin azaldılması və ekoloji təmizliyi qorumaq üçündür”.
Mütəxəssis bildirib ki, indiyə qədər insanlar bu torbaları evə gətirdikdən sonra tullantı torbası olaraq istifadə edirdi. Sadəcə indi isə cibindən bu pulu ödəyərək həmin torbalardan alacaq.
Ayan Rzayeva