Sürücüləri daha çox maraqlandıran məsələlərdən biri də avtomobilin hansı hallarda mühafizə olunan cərimə meydançasına aparılmasıdır.
Bakı Şəhər Dövlət Yol Polis İdarəsinin baş inspektoru, polis mayoru Araz Əsgərli Ednews-a açıqlamasında bildirib ki, qüvvədə olan İXM-in 96-cı maddəsinə əsasən, hərəkətdə olan nəqliyyat vasitəsi aşağıdakı hallarda dayandırıldıqdan sonra DYP əməkdaşı tərəfindən cərimə meydançasına yerləşdirilə (aparıla) bilər.
“Saxlanılmış nəqliyyat vasitəsini idarə edən şəxsin sürücülük hüququnun olmaması və yaxud da onunla birlikdə gedən sərnişinlərdən hər hansı birində sürücülük vəsiqəsi olmadıqda.
- nəqliyyat vasitəsinin dövlət qeydiyyat nişanları və ya onlardan biri olmadıqda, yaxud saxta və ya qeyri-standart olduqda və ya nəqliyyat vasitəsini başqa nəqliyyat vasitəsinə verilmiş dövlət qeydiyyat nişanı ilə idarə etdikdə;
- dayandırılmış nəqliyyat vasitəsinin mühərrik, ban və şassi nömrəsi nəqliyyat vasitəsinin qeydiyyat şəhadətnaməsindəki rəqəmlərə uyğun gəlmədikdə;
- dayandırılmış nəqliyyat vasitəsi alkoqoldan, narkotik vasitələrdən, psixotrop maddələrdən və ya güclü təsir göstərən digər maddələrdən istifadə edilməsi nəticəsində sərxoş vəziyyətdə olmasını güman etməyə kifayət qədər əsas olan şəxs tərəfindən idarə olunduqda və onunla birlikdə gedən sərnişinin nəqliyyat vasitəsini idarə etmək hüququ olmadıqda;
-Müvafiq icazə olmadan səs siqnalları və çoxavazlı işıq sistemlərinin istifadə olunması olduğu təqdirdə.
- yol hərəkəti qaydaları əleyhinə olan inzibati xətaların törədilməsinə görə inzibati cərimə növündə inzibati tənbeh tətbiq etmə haqqında qərarın qanuni qüvvəyə mindiyi gündən 2 ay müddətində icra edilməməsinə görə nəqliyyat vasitəsinin saxlanılması barədə məhkəmə və ya DYP orqanının qərarı olduqda;
- İcazə verilən qabarit, çəki və yüklə birlikdə oxa düşən kütlə parametrlərinə dair tələblər pozulmaqla yüklənən iriqabaritli və ya ağırçəkili nəqliyyat vasitələri ümumi istifadədə olan avtomobil yollarında idarə edildikdə”.
İnspektor onu da xüsusi ilə vurğuladı ki, bəzən sürücülər əlavə mübahisələr aparmaqla, özlərini haqlı çıxarmaq naminə nəzərdə tutulmuş qaydaları pozub tabesizlik nümayiş etdirirlər ki, bu inzibati Xətalar məcəlləsində daha ağır formada hüquqi məsuliyyətlər yaradır.
“Hər bir Vətəndaşımızın diqqətinə çatdırmaq istəyirik ki, avtomobilləri qanunvericiliyin tərəfləri çərçivəsində idarə etsinlər ki, hər hansı hal nəqliyyat vasitəsini idarə etmədən kənarlaşdırmağa əsas yatarmasın”.
Aynurə İsmayılqızı