Türkiyədə baş verən dəhşətli zəlzələ nəticəsində həyatını itirən dörd azərbaycanlı tələbədən biri Şahin Vəliyevin anası Esmira Hüseynova mediaya açıqlamasında bildirib ki, tətil olmağına rəğmən təyyarə biletləri baha olduğu üçün Şahin həmin ərəfədə vətənə dönə bilməyib.
Bu açıqlama təyyarə biletlərinin satışında tələbələrə güzəştlər edilməsi mövzusunu yenidən gündəmə gətirib.
Azərbaycan Respublikası Təhsil Nazirliyi yanında İctimai Şuranın üzvü, ekspert İlqar Orucov sosial şəbəkədə yazdığı fikirlərlə bu məsələyə toxunub.
“Türkiyədə vəfat edən tələbələrdən birinin anası deyir ki, oğlum tətilə gəlməli idi, bilet bahadır deyə gələ bilmədi. Tələbələr üçün təyyarə biletlərinə mütləq güzəştlər etmək lazımdır. Bu gənclər bizim gələcəyimizdir”.
Məsələ ilə bağlı Ednews-a açıqlama verən ekspert bildirib ki, söhbət təkcə Bakı-İstanbul reysindən getmir. AZAL digər şəhərlərə həyata keçirdiyi uçuşlarda da tələbələrə endirimlər etməlidir.
“Bunu tək mən demirəm. Çoxu razılaşar ki, AZAL-ın hətta endirimli qiymətləri də tələbə büdcəsi üçün çox bahadır. Necə olur ki, iki saatlıq İstanbul uçuşunun qiyməti ondan daha uzaq istiqamətə uçuş edən “Wizzair” biletlərindən qat-qat baha olur? Tbilisidən İstanbula uçuşların qiyməti Bakıdan daha ucuzdur. AZAL-ın aşağı büdcəli “Buta” şirkətinin də bilet qiymətləri standartları aşır. Bakıdan Türkiyənin digər şəhərlərinə də reyslər var. Onların qiymətlərində endirimlər varmı? – təəssüf ki, yox.
Bu gənclər bizim gələcəyimizdir. Sabah gəlib ölkədə cəmiyyətin, dövlətin inkişafı üçün çalışacaqlar. Niyə onların maliyyə xərclərini azaltmaq üçün addımlar atılmır? AZAL bu istiqamətdə nə edib? Dövlət hər zaman cəmiyyətin həssas qruplarından olan tələbələr üçün təqaüdlərdə artımlar edir. İri korporasiyalar, qurumlara da bu istiqamətdə tapşırıqlar verilməlidir. Bu şirkətlər vətəndaşların hesabına fəaliyyət göstərir. Niyə vətəndaşın xeyrinə heç bir iş görmürlər? Tələbə üçün hər zaman hər yerdə güzəştlər olmalıdır. Necə ki, dünyanın sivil ölkələrində bu belədir”.
Məsələ ilə bağlı "Azərbaycan Hava Yolları" QSC-nin İctimaiyyətlə əlaqələr xidmətinin mətbuat katibi Nərmin Xəlilova Ednews-a bildirib ki, Bakı-İstanbul istiqamətində təyyarə biletlərinin satışında tələbələr üçün xüsusi güzəştlər mövcuddur.
“Aviabiletləri əldə etmək üçün Azərbaycan və xarici universitetlərin tələbələri AZAL-ın satış ofislərinə yaxınlaşaraq tələbə bileti və ali təhsil müəssisəsindən arayış təqdim etməlidir”.
Törə Zeynallı