Bir neçə gün əvvəl Siyəzən rayonu ərazisində içərisində müəllimlərin olduğu mikroavtobusun qəzaya uğraması paytaxtdan bölgələrə işə gedən müəllimlərin sosial təminatı məsələsini yenidən gündəmə gətirib.
Mövzu ilə bağlı Ednews-a fikirlərini bildirən təhsil eksperti Elşən Qafarov bildirib ki, müəllimlərin işə qəbulu imtahanlarının şəffaf keçirilməsi son dövrlərdə təhsil islahatlarının uğurlu nəticəsidir. Bununla belə, bölgələrə dərs deməyə gedən gənc müəllimlərin sosial müdafiəsi istiqamətində görülən işlər yetərli deyil.
“Nazirlər Kabinetinin 14 aprel 2010-cu il tarixli 67 nömrəli qərarı ilə bölgələrə işləməyə gedən 35 yaşa qədər müəllimlərin sosial təminatı ilə bağlı müəyyən tədbirlər görülür. Lakin bu, kifayət deyil. Rayon mərkəzindən 20 km-ə qədər məsafədə işləyən müəllimlərə aylıq 100 manat, 20 km-dən artıq olanda isə bu məbləğə əlavə olaraq 90 manat da ödənilir. Həmin qərarda göstərilir ki, bölgələrdə yaşamaq istəyən müəllimlərə bələdiyyələr tərəfindən yer ayrılmalıdır. Amma bələdiyyələr buna əməl etmir. Torpaq sahəsi ayrılsa belə 400-600 manat əməkhaqqı alan müəllim hansı maddiyatla özünə yaşayış evi tiksin?! Sovet dövründə bölgələrdə qonaq evləri və ya müəllimlər evləri tikilirdi, uzaqdan gələn müəllimlər də burada qalırdılar. Düşünürəm ki, bu təcrübəni bərpa etmək lazımdır. 2022-ci il ərzində də səhv etmirəmsə bir neçə belə bədbəxt hadisənin şahidi olduq. Bəzi müəllimlər qəzalar nəticəsində dünyasını dəyişdi, bəziləri ömürlük sağlamlığını itirdi. Bu, Azərbaycan təhsilinə böyük zərbədir”.
E.Qafarov bildirib ki, müəllimlərin sosial müdafiəsi ilə bağlı Təhsil Nazirliyi və digər aidiyyatı qurumlar koordinasiyalı şəkildə çalışmalıdırlar:
“Bölgələrə gedib dərs deyən müəllimlərin sosial təminatı ilə heç kim maraqlanmır. Əvvəllər 35 yaşa qədər hər bir müəllim Nazirlər Kabinetinin 67 nömrəli qərarında göstərilən imtiyazlardan hər dəfə məktəb dəyişdikcə 3-5 il müddətində istifadə edə bilirdi. Qərarda edilmiş dəyişikliklərdən sonra müəllimlərə artıq bir dəfə bu imtiyazlardan istifadə hüququ verilir. Fikrimcə, yerli icra hakimiyyəti orqanlarını da məsələyə cəlb etmək lazımdır. Məktəb olan kəndlərdə müəllimlərə yaşayış yerləri ayrılmalıdır. Müəllim dərs demək üçün hər gün saatlarla yol qət etməməli, maddiyyat sərf etməməlidir. Azərbaycan müəlliminin layiqli sosial müdafiəsi bütün cəmiyyət üçün prioritet olmalıdır”.
Məsələ ilə bağlı Elm və Təhsil Nazirliyinin mətbuat xidmətindən bildirildi ki, dövlət sifarişinə əsasən kənd rayonlarında əmək fəaliyyətinə başlamaq üçün konkret iş yerlərinə göndəriş almış müəllimlərə yol xərci, əmlakın daşınması üçün nəqliyyat xərci və ilkin yaşayış şəraitinin yaradılması məqsədi ilə əməkhaqqının iki misli həcmində birdəfəlik yardım ödənilir.
Araşdırmamızdan da bəlli oldu ki, regionlara köçən müəllimlər daimi mənzillə təmin olunmurlar.
Məsələni diqqətdə saxlayacağıq.
Törə Zeynallı