Türkiyədən fərdi istifadə üçün dərmanların gətirilməsinə qadağa qoyulması barədə iddialar səsləndirilib.
Bu barədə sosial şəbəkə istifadəçilərdən biri məlumat verib.
“İldə ən az on dəfə Azərbaycana “ptt” ilə dərman göndərirdim. Fərqli dostlara, tanışlara. Bu il ilk dəfə belə bir xahiş gəldi, dərmanları aldım, getdim poçta. Orada mənə bildirildi ki, artıq Azərbaycana dərman göndərilmir”.
Müştəriyə səbəb kimi artıq göndərilən dərmanların Azərbaycan tərəfindən müsadirə edilməsi olub.
Onsuz da Rusiya-Ukrayna müharibəsindən əvvəl Azərbaycana hər iki ölkədən dərman idxal edilirdi. Lakin müharibə başlayandan sonra Ukraynanın dərmana olan ehtiyacı artdı, eyni zamanda Rusiyaya da ciddi iqtisadi sanksiyalar tətbiq olundu.
Eyni zamanda ölkəmizdə dərman qıtlığı da mövcuddur. Səbəblər nələrdir? Niyə vətəndaşlar dərman almaq çətinlik çəkirlər?
Məsələ ilə bağlı Ednews-a Səhiyyə Nazirliyinin mətbuat xidmətinin əməkdaşı Elvin Hacıyev bildirdi ki, dərmanların aptek təminatına Səhiyyə Nazirliyi baxmır.
“Bu sualı ölkəyə dərman gətirən özəl şirkətlər yaxşı cavablandırar. Çünki apteklərin dərman təminatını onlar həyata keçirir. “AvroMed”, “Zəfəran”, “Zeytun” kimi şirkətlər...”
Azərbaycan Dövlət Gömrük Komitəsi tərəfindən deyildi ki, bu məsələ ilə bağlı bizə məlumat daxil olmayıb.
“Şəxsi istifadə məqsədilə dərmanı başqa ölkədən gətirmək olar. Sosial şəbəkədə yayılan məlumatı isə düzgün hesab etmirəm. Nazirlər Kabinetinin 305 saylı qərarı var. O qərarda deyilir ki, Azərbaycan Respublikasında dövlət qeydiyyatından keçməyən dərman vasitələri də daxil olmaqla, şəxsi istifadə üçün zəruri olan miqdarda dərman vasitələri ölkəyə gətirilə bilər ”.
Analitik Ekspertiza Mərkəzinin (AEM) İctimaiyyətlə əlaqələr və Kommunikasiya şöbəsinin müdiri Mətin Məcidli açıqlamasında qeyd etdi ki, məsələnin qurumla heç bir aidiyyatı yoxdur.
“Məlumat üçün deyim ki, bizim qurumun səlahiyyətlərinə ölkəyə rəsmi yolla idxal edilən dərmanların laboratoriya analizi və sənədlərin uyğunluğunu yoxlamaq daxildir. Poçtla kimsə dərman göndərirsə, bu şəxsi məsələsidir”.
M.Məcidli dərman qıtlığından da danışıb.
“Ölkədə dərman məsələsi ideal vəziyyətdə olmasa da, bu təkcə Azərbaycanda belə deyil. Geosiyasi, qlobal dəyişmələr dərman çatdırlması zəncirinə təsir edir. Azərbaycan da idxaldan asılı ölkədir. Belə faktorlar mövcuddur”.
Oğuz Ayvaz
