Xəbər verdiyimiz kimi¸ cəmiyyət içində sevilən tanınmış ilahiyyatçı, Məşədi Dadaş Məscidinin imamı Hacı Şahin Həsənli dünyasını dəyişib.
Ednews mərhum haqqında maraqlı faktları təqdim edir.
Şahin Hüseyn oğlu Həsənli 7 iyul 1974-cü ildə Bakı şəhərində dünyaya gəlib.
Atası iqtisadçı, anası müəllim olub. 1981-ci ildə Bakı şəhər 189 saylı orta məktəbin rus bölməsinə daxil olub, 1991-ci ildə həmin məktəbi bitirib.
Hacı Şahin 12 yaşı olanda atasını itirir, ailədə maddi çətinliklər yaranır. Məktəbi bitirən kimi 1991-ci ildə Azərbaycan Texniki Universitetinin Maşınqayırma fakültəsinə daxil olub.
***
90-cı illərdə məhəllədə qonşu uşaqlarla toplanıb məscidə gedirlərdi. “Aşura”, namaz qılan insanlar Hacı Şahində dinə böyük maraq yaradır. O illəri belə xatırlayır:
“Yadımdadır, ilk dəfə şeyx “şəhid” sözünü işlətməyə başlayanda bizə maraqlı gəlirdi ki, şəhid kimdir? Yəni dini biliklərimiz yox idi. Amma içimdə allahla rabitə yaratmaq istəyi var idi. Namaza başladım, dostlarımla birlikdə həyətimizdə ibadət evi açdıq. Camaat namazına imamlıq etmək və xütbə oxumaq üçün məni seçdilər”.
Din barədə mütalilələrini artırır, ərəb və fars, rus dillərini öyrənir, fərdi qaydada dini dərslər alır, xeyli kitablar oxumağa başlayır.
***
2001–2004-cü illərdə Bakı Dövlət Universitetinin Tarix fakültəsində ikinci ali təhsil alıb.
1998–2001-ci illərdə təsisçilərindən olduğu "İkmal" Gənclər Birliyinə sədrlik edib. Rəhbərlik etdiyi qurum ölkənin müxtəlif rayonlarında nümayəndəliklər açıb, ümumrespublika miqyasında müxtəlif tədbirlər keçirib. Fəaliyyətinin əsas istiqaməti milli-mənəvi dəyərlərin, sağlam həyat tərzinin və vətənpərvərlik hissinin gənclər arasında təbliği olub.
İnsanlar cəhənnəmi və cənnəti elə bu dünyada yaşamırmı, sualına Hacı belə cavab verib:
“İnsan cənnət və cəhənnəmi bu dünyada yaşayır. Axirət bu dünyanın əslində pərdəarxasıdır. Biz axirətə köçdüyümüz zaman əbədi var olacağıq. Amma bu varlıq bizim dünyadakı mənəvi durumumuzun inikasıdır, təzahürüdür. Cəhənnəm deyildikdə biz pirimitiv düşnməməliyik ki, yaxşı əməl edənləri güllü-çiçəkli yerlərə, pisləri isə qır qazanına atıb qaynadacaqlar. Cənnət dedikdə insanın daxili dünyasının xarici təzahürü nəzərdə tutulur. Hər bir insan öz cənnətində qalacaq. Axirət aləminin bu dünyadan əsas fərqi ondan ibarətdir ki, daxili aləmlə xarici aləm orada vəhdətdə olacaq”.
***
Hacı Şahin dindən başqa fəlsəfəyə marağı olub. Xüsusən, Qərb fəlsəfəsini oxumağ sevərdi. Ən çox Nitsşeni, Freydin yaradıcılığını mütaliə edirdi.
Hacı Şahin həyatla, dinlə, insanla bağlı müxtəlif fikirlərə sahib olub. Onun bəzi deyimlərini təqdim edirik:
“Həyat - məhəbbət bəslədiklərimizə qovuşmaq prosesi olduğundan biz yaranmış durumu dəyişməkdən ötrü sevgimizin nəyə yönəldiyini müəyyən etməkdən başlamalıyıq”.
“Həyatın kefi sevginin olmasında və sevdiyinə qovuşmaq üçün tər tökməkdədir”.
“Kaş bir dəfə dərin xoşbəxtliyi dadaydıq, o zaman ondan əl çəkməzdik. Burada "keçmişdə vaxtlarımız var idi" deyən insanların nostalgiya ilə yad etdiyi "xoşbəxtlik" nəzərdə tutulmur”.
***
“Məhəbbət - azad buraxmaq, səhv imkanı vermək, dəstəkləmək və özünü fəda etməkdir. Məhəbbət - sevdiyinin xüsusiyyətlərini əxz etmək, onun rənginə boyanmaqdır”.
“Böyük insana həyatın hətta böyük dərdi də kiçik görünür, ona görə də soyuqqanlılığını və ayıq-sayıqlığını əldən vermir. Böyüməliyik: həyatın zərbələri, onlar haqda düşünmək, səhvlərimizi təhlil etmək, peşmanlamaq, böyük hədəflər güdmək – bütün bunlar bizi böyüdür”.
***
Ailəli idi. İki qızı və iki oğlu var.
Bu gün martın 2-də ürək çatışmazlığından vəfat edib. Allah rəhmət etsin.
Oğuz