Yanvar və Fevral ayı ərzində Kliniki Tibbi Mərkəzə (KTM) dəm qazından zəhərlənmə ilə bağlı 569 nəfər müraciət edib.
Bunu Ednews-un sorğusuna cavab olaraq, Kliniki Tibbi Mərkəzin Mətbuat xidmətindən bildiriblər.
Qeyd olunub ki, 2023-cü il yanvar və fevral aylarında dəm qazından 569 nəfər zəhərlənib.
Bu ilin yanvar ayında dəm qazından zəhərlənən şəxslərin 84-ü kişi, 166-sı qadın, 41-i uşaq olmaqla ambulator müailcə, 3-ü kişi, 12-si qadın, 3-ü uşaq olmaqla stasionar müalicə göstərilib.
Fevral ayı üzrə isə dəm qazından zəhərlənən şəxslərin 73-ü kişi, 132-si qadın, 35-i uşaq olmaqla ambulator müailcə, 6-sı kişi, 11-i qadın, 3-ü uşaq olmaqla stasionar müalicə göstərilib.
Mövzu ilə bağlı ekspert Elçin Bayramlı qeyd edib ki, son illərdə dəm qazından zəhərlənmələrin və qazsızmadan partlayışların sayında azalma var. 2022-ci ildə dəm qazından zəhərlənmə və partlayış tipli qəza hadisələrin sayı 280 civarında olub, bu da 2011-ci ilin göstəricisi ilə müqayisədə kəskin azalma deməkdir. 2011-ci ildə bu göstərici 1 000-ə yaxın olub:
“Belə problemlərin yaranmasının bir çox səbəbləri var. Texniki təhlükəsizliyi düzgün riayət edilmir. Qaz cihazlarının qeyri-standart olması, mənzillərə qaz sistemi çəkərkən qeyri-peşəkarlıq müşahidə olunur. Mətbəxin və hamamın yerini dəyişmək düzgün deyil. Bu işi sahə üzrə təcrübəsi olan insanlar etməlidir. Şaxtalar mütləq şəkildə təmizlənməlidir. Su qızdırıcını hamama, mətbəxə qoymaq birmənalı olaraq səhvdir. Qapılarda yarıqlar olmalıdır”.
Ekspertin sözlərinə görə, bu ilə kimi Azəriqaz-ın əməkdaşları evə daxil olub, qaz sistemini yoxlaya bilmirdilər. Lakin bu ilin ikinci yarısından artıq onlar evlərə daxil olub, yoxlamalar apara biləcəklər. Bu çox yaxşı haldır. Həm partlayışların, həm də dəm qazlarından boğulmaların qarşısnı alacaq.
“İnkişaf etmiş ölkələrdə qaz detektoru quraşdırılır. Bu mütləq hər bir evdə qoyulmalıdır. Bizim ölkədə isə bu kimi məcburiyyət yoxdur. Bu da çox pis haldır. Vətəndaşlar bu məsələyə çox laqeyd yanaşırlar. Ümumiyyətlə, xaricdən gətirilən istilik cihazlarına nəzarət Azəriqaz tərəfindən həyata keçirilərsə, təhlükəsizliyi daha yaxşı şəkildə qorumaq olar. Cihazlar mütləq şəkildə yoxlanılmalıdır. Standarlarına baxılmalıdır. Təlimata uyğun sistem qurulmalıdır. Əgər qaz detektoru qoyulsa və Azəriqaz-ın əməkdaşları evlərdə yoxlama keçirsə, dəm qazından boğulmaların sayı azalmaqla yanaşı sıfıra endirə bilərik”.
Aysel Şahmar