Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev açıqlamasında bildirib ki, Beynəlxal Qırmızı Xaç Komitəsi (BQXK) itkin düşmüş azərbaycanlılarla bağlı demək olar ki heç bir iş görmür.
Prezientin köməkçisi həmçinin qeyd edib ki, Ermənistan I Qarabağ müharibəsi zamanı itkin düşmüş 3900-a qədər soydaşımızın taleyinin müəyyənləşdirilməsi üçün heç bir əməkdaşlıq etməyib.
“Qırmızı Xaç komitəsinin fəaliyyətini qəbul edə bilmərik. Bu qurumun fəaliyyəti birbaşa Ermənistanda fəaliyyət göstərən Qırmızı Xaç Komitəsinə tabedir. Şübhəsiz ki, bu yolverilməzdir. Başqa bir ölkənin tabeliyində olan qurumun Azərbaycan ərazisində fəaliyyəti yolverilməzdir”.
Bu sözləri Ednews-a açıqlamasında Daxili İşlər Nazirliyi yanında ictimai şuranın sədri Əliməmməd Nuriyev bildirib.
Onun sözlərinə görə bu Ermənistanda deyil , Azərbaycanda fəaliyyət göstərən BQXK-a tabe olmalı idi.
“Burada hüquqi baxımdan problem var. Əslində onların bu hərəkətini Azərbaycanın suverenliyini qəbul etməmək kimi də qiymətləndirmək olar. Ona görə də BQXK bu barədə düşünməlidir. O özünün humanist missiyasına uyğun olaraq bitərəflilik missiyasına söykənərək neytrallığını qoruyub saxlamalıdır. Bu da Azərbaycan dövlətinin suverenliyinə onun qanunlarına itaət etməsi ilə baş tutmalıdır”.
O, həmçinin qeyd edib ki, BQXK-nin 3900-a yaxın taleyi hələ də məlum olmayan azərbaycanlılar haqqında hər hansı bir fəaliyyət aparması da görünmür.
“Eyni zamanda onlar 30 il işğal dövrü müddətində ciddi işlərlə məşğul olmayıblar.
Bu gün BQXK Erməni cinayətkarlarının himayəsi ilə məşğuldur. Onların gündəlik təlabatlarını qarşılayırlar. Azərbaycan tərəfi üçün belə yanaşma sərgilənməyib. İllərdir məcburi köçkünlərlə bağlı məsələlərdə heç bir addım atılmayıb. BQXK-nın Xankəndi və digər ərazilərdəki fəaliyyəti bitərəf şəkildə yerinə yetirilməlidir.
İşğaldan azad olnunan ərazilərə insanları köçürəndə BQXK-dan nümayəndələrindən hər hansı yardım görməmişik. Düşünürəm ki, Xankəndi və digər ərazilərdə olan fəaliyyətləri dayandırılmalıdır”.
O, son olaraq qeyd edib ki, beynəlxaq qurumlar Azərbaycan ərazisinin bütövlüyünü tanımalı və hörmət etməlidirlər.
“BQXK tərəfindən Azərbaycanın hər bir yerində yaşayan vətəndaşlara eyni yanaşma olmalıdır”.
Ayan Rzayeva