Nüfuzlu “Əl-Cəzirə” media şəbəkəsinin əməkdaşı Əli Zalat erməni işğalından azad edilmiş Horadiz kəndinin məscidində azan oxuyub.
Ednews xəbər verir ki, bu barədə məlumatı Beynəlxalq Avrasiya Mətbuat Fondunun prezidenti Umud Mirzəyev facebook profilində yazıb. O, qeyd edib ki, martın 20-də “Əl-Cəzirə” media şəbəkəsinin əməkdaşları Əli Zalat və Mohamad Sulaimanla birlikdə Füzuli rayonunun işgaldan azad olunmuş ərazilərinə səfər ediblər:
“Vəhşi düşmənin xarabalığa çevirdikləri kəndlər, qəsəbələr, məscidlər, məzarlıqlar, minalanmış ərazilər həmkarlarımızı dəhşətə gətirdi. Gördüklərindən göz yaşlarını saxlaya bilməyən Əli Zalat Horadiz kənd məscidində qeyri-ixtiyari əllərini ulu Tanrıya açaraq azan oxumağa başladı. Bildiyim qədər Əli Zalat bu məsciddə müharibədən sonra azan oxuyan ilk müsəlman idi. Nə sirri xudadırsa biz məsciddən kifayət qədər uzaqlaşsaq belə Əlinin o məlahətli, möhtəşəm səsi hələ də mənim qulaqlarımı tərk etmir”.
Qeyd edək ki, “Əl-Cəzirə” Media Şəbəkəsi Beynəlxalq Avrasiya Mətbuat Fondu ilə birgə Qarabağda mina problemi ilə bağlı sənədli filmlər çəkəcək.
Xatırladaq ki, BAMF-la “Əl-Cəzirə” 10 ildir ki, əməkdaşlıq edir. 44 günlük müharibə zamanı kanal BAMF-la birgə 4 film lentə alıb.
