Bir müddət əvvəl sosial şəbəkələrdə iti avtomobilin arxasına bağlayaraq sürüyən şəxsin görüntüləri yayılıb. Bu hadisədən sonra həmin şəxslə profilaktiki söhbətlər aparılıb. Nəzərə alaq ki, bu kimi hadisələrlə artıq neçənci dəfədir ki rastlaşırıq. Heyvanlara şiddət hallarının sayı artıb.
Bu kimi halların qarşısını almaq üçün hansı tədbirlər görülməlidir? Qanunvericilikdə hər hansı dəyişiklilər olunmalıdırmı?
Heyvansevər fəal Sitarə İbrahimbəyli Ednews-a açıqlamasında bildirib ki, bu məsələ ilə bağlı qanunvericilikdə bir sıra dəyişikliklər olunmalıdır.
“Normalda belə hallarla rastlaşdıqda həmin şəxsləri cərimələnməlidirlər. Düşünürəm ki, qanunvericilikdə bir sıra dəyişikliklər olunmalıdır. Həmin şəxsi cinayət məsuliyyətinə cəlb olunmalıdır. Bu məsələ təkcə 500 manat ödəməklə həll olunmamalıdır”.
S. Ibrahimbəyli onu da qeyd edib ki, bu şəxslərin psixoloji problemi var.
”Təkrar-təkrar bu hadisələr törədilə bilər. Düşünürəm ki, normal psixologiyaya sahib insan belə hərəkət etməz. Həmin şəxsləri tapıb bu insanlara psixoloji yardım etməliyik”.
Hüquqşünas Şamil Paşayev isə məsələ ilə bağlı açıqlamasında bildirib ki, Konstitusiyada heyvanların qorunması ilə bağlı bir sıra qanunlar var.
“Azərbaycan Respublikasının Məcəlləsinin 174-cü maddəsində qeyd olunub ki, heyvanlarla rəhimsiz rəftar edilməsi, onların şikəst olunması 500 manat məbləğində cərimə oluna, inzibati məsuliyyətə səbəb olur. Bundan başqa inzibati Xətalar Məcəlləsinin 290-cı maddəsində ev heyvanlarının sərxoş şəxslər tərəfindən saxlanılması, ev heyvanlarının üzərində yarış keçirilməsi, heyvanların xarici görünüşünün dəyişdirilməsi, eyni zamanda ev sahibinin müəyyən edilmiş qayğıların göstərilməməsinə görə 200 manat cərimə edilir. Xəbərdarlıq İnzibati Cəzalar Məcəlləsində tənbeh növlərindən biridir”.
Ayan Rzayeva