İslam dinində alkoqol haram sayılsa da, içki içən müsəlman az deyil. Ramazanda çox müsəlmanlar içkidən imtina edir, haramdan uzaq durur. Lakin son dövrlər bəzi restoranlarda iftar vaxtı həm içki, həm də iftar menyusu verildiyinin şahidi oluruq. Bu, təbii olaraq oruclu insanlarda qıcıq yaradır. Əhali bilmir hansı restorana getsin ki, tutduğu oruc batil olmasın. Bəs içkili məkanda iftar açmaq orucu pozur?
Bu barədə Ednews-a danışan ilahiyyatçı Tural İrfan bildirdi ki, içki verilən və içilən məkanlarda oturmaq, iftar açmaq, namaz qılmaq olar. Sadəcə əgər başqa daha uyğun yer varsa içki və haram olan yeri dəyişmək lazımdır.
“Bəziləri İran təbliğatına uyub guya mühafizəkarlıq etmək istəyirlər. Peyğəmbər 13 Məkkədə yaşadı və orada şərab da içirdilər, digər haramlar da edirdilər. Hətta Kəbədə içirdilər, Peyğəmbər də orada namaz qılırdı, təvaf edirdi. Oruc da tuturdu, iftar da edirdi. Hətta içən adamları evinə dəvət edib onlara nəsihət edirdi, dini təbliğ edirdi. Sadəcə bizim bəzi insanlar bilmir ki, oruc tutduğunu necə reklam etsin. Bu da normal deyil. İbadət edən adam, oruc tutan adam heç bildirməməlidir ki, o orucdur. Adi, nornal vaxtda harada yemək yetirsə elə orada da oruc aça bilər. Haram hər yerdə, hər zaman haramdır. Dində belə bir şey yoxdur ki, adi vaxtda içki olan kafedə nahar etmək olar, oruc vaxtı olmaz. Əgər olmasa adi vaxtda da olmaz, iftar vaxtı da olmaz”.
Onun sözlərinə görə, o adamlar məgər içki olan və satılan dükanlardan ərzaq almırlarmı? İçkili adamların olduğu nəqliyyata minmirlərmi, yaxud qohum əqrabalarından içən adam yoxdurmu?
“Əksinə içki içilən yerdə oruc açmaq lazımdır ki, içənlər də ibrət götürsün. Həzrət İsa bir gün sərxoş adamlarla oturub deyib - gülürdü. Ona rişğəndlə dedilər "Ey İsa, yenə dostlarınla oturub nə edirsən..." İsa cavab verdi ki, həkim nasaz adamların yanında olmalıdır. Sağlam adamlara həkim lazım deyil. Bu şəxsləri də ola bilsin həyat sarsıdıb, kədər içkiyə mübtəla edib. Ona görə mən onların dərdini bölürəm”.
Oğuz