Bu gün Azərbaycanın xalq yazıçısı, Azərbaycan Yazıçılar Birliyinin katibi, hüquq elmləri doktoru Çingiz Abdullayevin ad günüdür. Onun 64 yaşı tamam olur.
Bu münasibətlə başda Beynəlxalq Avrasiya Mətbuat Fondunun prezidenti Umud Mirzəyev və BAMF ailəsi dəyərli insan, Azərbaycan Yazıçılar Birliyinin birinci katibi, hüquq elmləri doktoru, Xalq yazıçısı, Beynəlxalq Avrasiya Mətbuat Fondunun Himayəçilik Şurasının sədri, Çingiz Abdullayevi doğum günü münasibətilə təbrik edir, ona can sağlığı, mənalı və sağlam ömür yolu və əmək fəaliyyətində uğurlar arzulayır!
“Çingiz Abdullayev həm də Beynəlxalq Avrasiya Mətbuat Fondunun Himayəçilik Şurasının sədridir. Onun BAMF-da xüsusi yeri var. O, bizi hər zaman dünyada layiqincə təmsil edib, tanıdıb. Çingiz bizim böyük yazıçımız, dəyərli ziyalımızdır. Onu təbrik edir və gələcək işlərində müvəffəqiyyət arzulayırıq”.
Qeyd edək ki, Çingiz Abdullayev 1959-cu il aprelin 7-də Bakıda ziyalı ailəsində anadan olub. Atası Abdullayev Akif Abdulla oğlu Böyük Vətən müharibəsinin iştirakçısı olub,Naxçıvan Muxtar Respublikasında prokuror, Bakı şəhərində prokuror müavini, Azərbaycan Vəkillər Rəyasət Heyətinin sədri vəzifələrində çalışıb.
Ç.Abdullayev Bakıda 189 saylı şəhər məktəbini bitirib. Azərbaycan Dövlət Universitetinin hüquq fakültəsində təhsilini davam etdirib.
Ədəbi fəaliyyətə tələbəlik dövründən başlayıb. 1983-cü ildən dövri mətbuatda oçerk, məqalə və detektiv janrda yazdığı hekayələrlə müntəzəm çıxış edir. Rus dilində yazıb-yaradır. İngilis və italyan dillərində sərbəst danışır. Əsərləri xarici ölkə xalqlarının dillərinə tərcümə olunub. Almaniyada, İrlandiyada, Fransada, Rusiyada kütləvi tirajla buraxılıb, 27 milyon nüsxədə olan 600-dən çox kitabı dünyada yayılıb. 194 adda kitabın müəllifidir. Bütün bu kitablar onu siyasi detektiv janrında yazan ən məhsuldar müasir yazıçılardan biri kimi tanıtdırıb. Xidmətlərinə görə "Qırmızı Əmək Bayrağı” ordeni və medallarla təltif olunub.
Çingiz Abdullayev 2009-cu il aprel ayının 7-də Azərbaycanın ədəbi həyatında fəal iştirakına görə "Şöhrət" ordeni ilə təltif edilib. 2014-cü ilin noyabr ayından İnterpolun fəxri səfiridir.
Xatırladaq ki, Xalq yazıçısı Çingiz Abdullayev 2022-ci ildən BMT-nin İqtisadi və Sosial Şurasının əsas məşvərətçi statuslu üzvü olan Beynəlxalq Avrasiya Mətbuat Fondunun Himayəçilik Şurasının sədri seçilib.