“Səhhətimdə xeyli irəliləyiş var, inşallah bir neçə günə xəstəxanadan çıxıb müalicəmi evdə aparacağam. Hələ ki, namaza və oruca fiziki imkanlarım yol vermir. Ümid edirəm ki, bunu da uyğun şərtlərdə bərpa edəcəyəm”.
Ednews xəbər verir ki, bu sözləri deputat Fazil Mustafa özünün “Facebook” profilində yazıb.
Onun sözlərinə görə bu gün köməkçilərinə hər həftə oluğu kimi Bakıxanov qəsəbəsindəki ofisində seçiciləri qəbul etməyi və tədbir görmək üçün müraciətləri ona çatdırmalarını tapşırıb:
“Artıq gələn həftədən başlaraq evdən seçicilərin onlayn qəbulunu da keçirməyi nəzərdə tuturam. Şəraitə uyğunlaşmaq lazımdır. Solaxay olmağım bu məqamda işimə yaradı. Fürsət tapdıqca yeni kitabım üzərində xeyli işlədim. Təəssüf ki, yayda Berlində keçiriləcək Ümumdünya Xüsusi Olimpiya oyunlarında iştirakımı təxirə salmalı oldum. Azərbaycan Xüsusi Olimpiya komitəsinin prezidenti olaraq komandamızın uğur qazanacağına inanıram, ruhən onlarla birlikdə olacağam.
Milli düşmənlərimizə gəldikdə isə, bilsinlər ki, mübarizə bu gün də, yarın da var. Mən də onun ən ön sıralarında! Bu Vətən, bu vövlət, bu millət əmanətimizdir. Canımızda azacıq ölüm qorxusu vardı, şükür ki, onu da yoxa çıxardınız. Bundan sonrası sizlərə çox ağır olacaq! Bu mübarizədə fədakarcasına borcunu yerinə yetirən qardaş-bacılarımızın həmişəkindən daha güclü əzmlə yanındayam!”, - deyə deputat əlavə edib.
Qeyd edək ki, 28 mart gecə saatlarında Böyük Quruluş Partiyasının sədri, deputat Fazil Mustafa evinin qarşısında güllələnmişdi.
Oğuz
