Azərbaycan Milli Elmlər Akademiyası (AMEA) nəzdində Respublika Seysmoloji Xidmət Mərkəzinin rəhbəri Qurban Yetirmişli bildirib ki, Bakıda bütün köhnə binalar söküləcək və hər birinin yerində yeniləri tikiləcək. O, qeyd edib ki, həmin binalarar artıq 30-40 il istismar müddətini bitirib.  

Məsələ ilə bağlı Azərbaycanın ustad memarı Fəxrəddin Miralay Ednews-a bildirib ki, hansısa binaya 30 il zəmanət verilməsi gülünc bir yanaşmadır:

“30 ilə bir insan həyətə, qonşuya yaxınlıqdakı marketə öyrəşir. Harada nə olduğunu öyrənir. Əslində Sovet vaxtında bəzi  binalar üçün deyirdilər ki, 40-50 il sonra sökülməlidir. Lakin burada səbəb başqa idi. O mənzillər zavod və fabrikdə işləyən evsiz sakinlər üçün idi. Bu evlərlə onlar təmin edilirdi. Yəni, müvəqqəti deyildi.Nyu-Yorkda 19-cu əsrin axırında tikilən mənzillər hələ də qalır. Mənzillər hələ də sağlam vəziyyətdədir. Arxitektura 30-40 il üçün deyil”.

Memar qeyd edib ki, elə mənzil və abidələr var ki, min il yaşayır.

“Elə Venesiya suyun içindədir. Çox yaxşı halda da qalıb. Azərbaycanın rayonlarına baxsaq Qax, Şəki və digər rayonlarında 200-300 illik evlər var. Heç uçmur da. Mən memaram tikdiyi tikilinin üstündə zəmanət verdiyim yadıma gəlmir. Orada sadəcə qayda var. O qaydalara əməl olunmalıdır. Öz yaşadığım ev Sumqayıtda 1959-cu ildə tikilib. 60 ildə həmin ev 2 böyük zəlzələ görüb. Heç binada çatda yoxdur”.

Söhbət əsnasında memar vurğulayib ki, normal tikilən mənzillər 30-40 ilə sökülməməlidir.

“Türkiyədəki zəlzələdən sonra bir neçə özünü "alim" hesab etmiş şəxslər dedi ki, Bakıda 4 mərtəbədən yuxarı mənzil tikilməsin. Həmin şəxs gedib zəlzələnin üstündə olan Yaponiyaya baxsın. 150 mərtəbə bina tikilir, o bina heç uçmur. Amma Bakıda 20 mərtəbə tikiləcək, o da uçacaq fikri yalandır. Sonra da deyirlər ki, “uzun binalar tikməyin, qiyamət yaxınlaşır”. Bu fikir axı nə qədər gülüncdür. Əgər bina normal tikilsə həmin bina əsrlərlə yaşaya bilər. Biz bunun şahidi olmuşuq”.

Məsələnin rəsmi tərəfini öyrənmək üçün Fövqalədə Hallar Nazirliyinin mətbuat xidməti ilə əlaqə saxladıq. FHN-in Mətbuat xidməti şöbəsinin baş məsləhətçisi Pərviz Aslanov Ednews-a açıqlamasında bildirdi ki, Nazirlər Kabineti tərəfin belə bir qərar verilərsə, Azərbaycan Respublikası Prezidentinin 26 dekabr 2006-cı il tarixli, 511 nömrəli Fərmanı ilə təsdiq edilmiş “Tikintidə Təhlükəsizliyə Nəzarət Dövlət Agentliyi haqqında Əsasnamə”yə əsasən, Agentlik ölkə ərazisində qanunvericiliklə müəyyən edilmiş qaydada öz səlahiyyətləri daxilində tikinti sahəsinə aid fəaliyyətini icra edəcək. Yəni, söküntü işlərində hər bir şeyin qanun çərçivəsində olunmasına baxacağıq.

Aysel Şahmar