Mütəxəssislər hesab edirlər ki, iqlim dəyişməsi getdikcə daha da çoxala bilər. Son aylar fəsillərin öz xüsusiyyətlərinə uyğun olmaması, yayı yay kimi, qışı qış kimi yaşaya bilməmək insanlarda narahatlıq yaradıb. Havaların fəsilə uyğunsuzluğu isə hər il daha da artır.
Mövzu ilə bağlı Ednews-a fikirlərini bildirən Milli Ekoloji Proqnozlar Mərkəzinin rəhbəri Telman Zeynalov deyib ki, hazırda qlobal iqlim dəyişikliyi haqda müxtəlif rəylər səslənir:
“Hər bir fəsil üçün il ərzində 3 ay vaxt ayrılıb, lakin onlar indi bir-birilərindən zaman oğurlayır . Bəziləri təbiətdə karbon qazının (CO2) artmasından narahatdır . Lakin bu, düzgün deyil. Karbon qazı insan həyatı üçün oksigen qədər önəmlidir və onun çatışmazlığı immun sistemini zəiflədir. Belə olan halda, insan orqanizmi tez qocalır".
Ekspertin sözlərinə görə, qlobal iqlim dəyişikliyinin iki əsas səbəbi var: "Birincisi, məhsulların gen dəyişdirilməsi . İqlim dəyişikliyinin ikinci səbəbi isə ozon qatındakı dəliklərin artmasıdır.”
Bəzi mütəxəssilər son aylar quşların hava ilə əlaqədar köçünün əvvəlki illər kimi çox olmadığını iddia edirlər.
Səbəb kimi ekologiya və iqlimdə dəyişiklərin baş verməsi göstərilir.
Fəlsəfə doktoru Elçin Sultanov da bildirib ki, baş verən kiçik iqlim dəyişkənliyi quşların köçünə təsir edir:
“Qlobal və qısa müddətli iqlim dəyişkənliyi mövcuddur. Qısa müddətli iqlim dəyişkənliyi isə hər zaman olub. Müəyyən 20, 30, 50, 100 illik müddətlərdə iqlim gah bir az soyuyur və ya gah da isinir. Amma bunun ilk növbədə quşların köçünə də təsiri olur . Son illər Azərbaycandan gedən və qayıtmayan quşlar yoxdur. Əgər bu davam edərsə, onda həmin quşlar nəsli kəsilməkdə olanların siyahısına aid edilir. Amma qışlayan quşların sayı, xüsusilə bataqlıq quşlarının sayı azalır. “
Qənbərova Səbinə
