Dənizkənarı Bulvar ərazisində skuter sürməyin qadağan edilməsi vətəndaşlar arasında birmənalı qarşılanmayıb.
Tətbiq edilən müvəqqəti qadağanın nə zaman aradan götürüləcəyi ilə bağlı rəsmi açıqlama verilməyib.
Bu qadağa nə dərəcədə effektivdir? Velosiped yollarının məhdud olduğu şəhərdə skuter istifadəçilərinin rahat və təhlükəsiz hərəkəti üçün hansı alternativ imkanlar yaradılmalıdır?
Məsələ ilə bağlı Ednews-a danışan nəqliyyat üzrə ekspert Rövşən Həsənovun sözlərinə görə, qadağa əvəzinə skuterlərin hərəkəti üçün alternativ üsullar düşünülməlidir:
“Təhlükəsizlik nöqteyi-nəzərdən yanaşsaq, skuterlərin hərəkəti üçün şərait yaradılmalıdır. Xaricdə də cərimələr tətbiq edilir, eyni zamanda alternativ variantlar təqdim olunur – velosiped yolları və s. Bəzi məqamlarda maneələr törədir, doğrudur, skuteri sürətlə idarə edirlər, digər şəxslər üçün təhlükəli vəziyyət yaranır. Bunun qarşısını almaq üçün mütləq qanunvericlikdə dəyişikliklər edilməli, alternativ yollar göstərilməlidir. Vətəndaş müəyyən məbləğ xərcləyib skuter alır - nəzərə alsaq ki, qiyməti elə də aşağı deyil, sonra cərimə tətbiq edilir ki, bunu idarə edə bilməzsən. Bu nə dərəcədə məntiqlidir?! O zaman satışına da məhdudiyyət qoyulsun. Problem bundadır”.
Ekspert qeyd edib ki, bulvar ərazisində qadağan olunan skuter istifadəsinə görə cərimə tətbiq edilə bilməz:
“Yol polisi yol hərəkəti haqqında qanundan, dəbilqə taxmaq, İnzibati Xətalar Məcəlləsinə əsasən cərimə olunmaqdan danışır. Qanunda boşluq var. Orada skuter adında bir şey yoxdur. Buna görə də cərimə tətbiq edilə bilməz, birmənalı olaraq. Cərimə tətbiq ediləndə qanunvericiliyin tələblərinə uyğun tətbiq edilir. Qanunda isə belə bir şey öz əksini tapmayıb. Mopedlər, elektromopedlər barədə maddələr göstərilib. Skuter isə moped deyil, mühərriksizdir. Yol polisi qanunun icraçısıdır. Qanunda skuter istifadəsi ilə bağlı hər hansı maddə yoxdursa, o, nəyi icra edəcək?! Mopedə tətbiq olunan cəriməni skuter sürən şəxsə yaza bilməz. Hüquq müstəvisində məhkəməyə verilsə, protokol tərtib edən həmin yol polisi məsuliyyət daşıyacaq. Qərarlar tətbiq edilməmişdən əvvəl ilk öncə alternatov göstərilir. Məs, nişan qadağan edir, nəqliyyat vasitəsini burada saxlamaq olmaz, o zaman yaxınlıqda bir parklama yeri göstərin vətəndaş gedib orada saxlasın. Bu gün hansısa skuteri saxlayıb, vətəndaşa cərimə tətbiq edilə bilməz”.
Törə Zeynal
.jpeg)
.jpeg)
