Xəbər verdiyimiz kimi Xəzər dənizinin Dağıstana yaxın ərazisində 5,7 bal gücündə zəlzələ qeydə alınıb.

 

Zəlzələ Azərbaycanın şimal-şərq rayonları, eləcə də Abşeron yarımadasında hiss olunub.

 

Azərbaycan seysmik ölkə hesab edildiyindən, vətəndaşlarımızın zəlzələyə hazırlığı, eləcə də təbii fəlakət zamanı davranış qaydalarını bilməsi vacibdir. 

 

Bəs bu təbii fəlakət anında necə davranmaq lazımdır ? Yaşadığımız evin ən təhlükəli yerləri hara sayılır?

 

Məsələ ilə bağlı Ednews-a danışan təhlükəsizlik eksperti Elmar Nurəliyev qeyd edib ki, heç kim təbii fəlakətlərin nə zaman baş verəcəyini öncədən proqnozlaşdıra bilmir.

“Ona görə də insanlar bu haqda mütləq şəkildə öncədən məlumatlı olmalıdır. Çünki zəlzələ də dağıdıcı zərbə vuran və təhlükəli təbii hadisələrdən biri sayılır. Belə hadisə olduqda ilkin biliklərin olması zəruri haldır. Zəlzələyə evdə olan zaman yaxalandıqda mütləq qapı arakəsmələrinə keçib təkanın bitməsini gözləmək lazımdır. Təbii ki, burada qeyri-sağlam arakəsmələrdən söhbət gedə bilməz. Hündür əşyanın yanında əyilərək , stolun altına girərək də dayanmaq olar. Bunlar praktiki olaraq dağıntı zamanı yuxarıdan beton düşərsə insanın üzərinə düşməsini əngələmək üçün vacibdir. Titrəyişlər bitdiyi zaman özümüzü ələ almağı bacarmalıyıq və mütləq qapını açmalıyıq.  Çünki dağıntı olarsa bizim çıxışımız bağlana bilər. Qaz, su, işığı da söndürmək şərtdir. Bundan əlavə insanların hər zaman kənar da təcili yardım çantası olmalıdır. İçində əsasən su, qida, dərman və geyim olmalıdır. Binanı tərk edərkən liftə minmək qəti şəkildə olmaz çünki elektrik gedər və siz liftdə qala bilərsiniz. Əgər vətəndaş zəlzələyə həyətdə yaxalanarsa, o, binalardan uzaq və açıq sahəyə çıxıb toplanış məntəqəsinə getməlidir. Dağıntı baş verərsə yenidən evə girmək olmaz. Çünki, uçqunlar təkrarlana bilər. Əgər evdə ciddi şəkildə dağıntı olarsa evi tərk etməmək və güvənli nöqtələrdə dayanmaq lazımdır. Bu zaman ən önəmlisi sakitliyi qorumaq və diqqətli olub ilkin praktiki təcrübələrindən istifadə etməlidir”. 

 

Kazımlı Rübabə