Yay tətilinin başlaması hamıdan çox şagirdlərin sevincinə səbəb olur. Dərs prosesinin yorğunluğunu çıxarmaq istəyən şagirdlər, tətil sevincini yaşamağı səbirsizliklə gözləyirlər. Lakin bir çox hallarda valideynlər yay tətilində də övladlarını dərs oxumağa, müxtəlif kurslara getməyi demək olar ki, məcbur edirlər.
Bəs, bu yöntəm uşaqlara necə təsir edir? Doğru olan hansı yoldur?
Ednews bununla bağlı psixoloq, eləcə də, təhsil ekspertinin fikrini öyrənib.
Psixoloq Gülnar Orucovanın sözlərinə görə, uşaqlar nəinki yay tətilində hətta tədris ilində belə istirahət etməlidirlər. Hər bir uşağın mütləq asudə vaxtı olmalıdır.
“Bir şagird 24 saat dərs oxuya bilməz. Gün ərzində 3 saatdan artıq dərs oxumaq insan beynini yorur, dərsə həvəssizlik yaradır. Yaddaşda bir sıra problemlərə yol açır. Yay tətili zamanı ümumiyyətlə çalışmaq lazımdır ki, uşaqlarımız açıq havada istirahət etsinlər. Yay tətilinin müəyyən zaman çərçivəsində uşaqlar mütaliə etməlidirlər”.
Psixoloq qeyd edir ki, tətil zamanı uşağı məcbur oxutmaq onun gələcəyi üçün uğusuzluğdur. Yəni hər bir uşaq istəyərək oxumalıdır.
“ Uşaqlar yay tətili müddətdə heçnə oxumasalar , xüsusi ilə ibtidai sinif şagirdləri vurma cədvəllərini yaddan çıxaracaqlar. Toplama, çıxma, həll etməkdə çətinlik çəkəcəklər. Uzun müddət 90 gün ərzində heç birşey yazmasalar artıq yazı xətti pisləşəcək. Yəni uzun zaman ara vermək zehni kütləşdirir. Zehin kütləşməsin deyə biz oxumalıyıq. Müəyyən zaman daxilində mütaliə edib yazı işlərimizi etməliyik”.
Təhsil eksperti Kamran Əsədov hesab edir ki, Dünya təhsil təcrübəsinə əsasən qeyd edim ki, yay fəsli uşaq orqanizminin inkişafı üçün çox əhəmiyyətlidir. Buna görə də, uşaqlar yay tətilini həm sağlamlıqları, həm də inkişafları naminə səmərəli keçirlməlidir.
“Valideynlər uşaqları üçün tətil planlarını əvvəlcədən – elə tədris zamanı hazırlamalıdırlar. Yay tətili gəlib çatandan sonra uşağın 3 ayı necə keçirəcəyini planlaşdırmaq çox çətin olur. Belə olanda isə uşaq gününü ya küçədə, ya da kompüter qarşısında keçirməli olur”.
K. Əsədov həmçinin qeyd edir ki, bu gün uşaqlarımız yay tətilində valideynləri ilə dənizə çimməyə və yaxud meşələrə, çaylara gedirlər. Bu səfərlər zamanı uşaqlar yaşlarına uyğun olmayan mənzərə ilə qarşılaşırlar. Uşağın tətil vaxtı gördüyü mənzərə dəniz kənarında baş verənlər və valideynlərinin meşələrdə kabab çəkərək içki məclisi qurma mənzərələridir. Şagirdlər 9 aylıq təhsildən sonra minimum 21 gün istirahət etməsə, təbiət qoynunda olmasa, onlar yeni tədris ilinə həvəssiz başlayacaqlar. Təəssüf ki, bizdə istirahət dedikdə dənizə girmək, meşəyə getmək, yatmaq başa düşülür. Əslində isə bu, dünyada istirahətin ən son meyarlarıdır”.
Aynurə İsmayıl