Bakı kimi böyük şəhərlərdə yaşayan hər kəs, yəqin ki, tıxaca bir dəfə belə olsa, düşüb. Hazırda tıxac əsas problemlərdən birinə çevrilib. İstər avtobus və metrodan istifadə edən insanlar, istərsə də öz şəxsi avtomobili olanlar səhər və axşam pik saatlarda yollarda tıxacdan əziyyət çəkirlər. Hətta sürücülər tıxacların avtomobillərə ziyan vurduğunu qeyd edirlər. Bu tıxac və sıxlıq daha çox Bakı və Abşeronda müşahidə olunur. 

Bəs şəhərdəki bu tıxacların, sıxlığın azalması üçün hansı tədbirlər görülməlidir? 

Məsələ ilə bağlı Ednews-a açıqlamasında nəqliyyat eksperti Elməddin Muradlı bildirib ki, tədbir görmək üçün çox gecikmişik:

“Hazırda tıxac, sıxlıq aktual mövzudur və bununla bağlı qabaqlayıcı tədbirlər görmək artıq gecdir. Bu gün işə başlasaq, 5 il sonra bəlkə effekfini görə bilərik. Ancaq artıq yol infastrukturu haqqında danışacağımız çox az şey qalıb. Çünki Bakının baş planı təsdiqlənib və burada özünü göstərən vacib məqamlardan biri də ictimai nəqliyyatın inkişafı istiqamətində dövlət tərəfindən ciddi tədbirlərin görülməsidir”.

Ekspert məsələnin həlli yolunda ictimai nəqliyyatdan istifadənin təsirlərini də vurğulayıb:

“Nəzərə almaq lazımdır ki, ictimai nəqliyyat nə qədər çox inkişaf etsə, şəxsi avtomobillərin istifadəsi bir o qədər azalacaq. Məktəbə, universitetə, işə gedənlərin hamısı ictimai nəqliyyata üstünlük verəcəklər. Çünki saatlarla yollarda qalmaqdansa, ictimai nəqliyyatdan faydalanmaq daha məntiqlidir. Bu şərait yaradılandan sonra insanlara deyə bilərik ki, buyurun, artıq ictimai nəqliyyat var və bundan istifadə edin. Lakin bu şərait olmadan insanlara tələb qoymaq olmaz ki, mütləq ictimai nəqliyyatdan istifadə edin”.

E.Muradlı qeyd edib ki, bu gün ölkəmizdə görmək istədiyimiz ictimai nəqliyyat yoxdur:

“Bu gün görmək istədiyimiz ictimai nəqliyyat təəssüf ki, yoxdur. Nə vaxt olacağı da məlum deyil. Planlar və təkliflər var, müzakirələr gedir. Metro şəbəkəsi inkişaf etsə, tramvay kimi sərfəli nəqliyyat növü olsa, fayda verəcək. Şəhərə daxil olmadan kənar dairə yolların çəkilməsi nəzərdə tutulmalıdır. Bu kimi layihələr reallaşsa, vəziyyətimiz yaxşı olacaq”.

Oğuz