Oktyabrın 1-dən taksi minik avtomobillərinin sürücülərinə dair yeni tələblər qüvvəyə minib. Qanuna əsasən, taksi minik avtomobillərinin sürücüləri etik davranış və avtomobil nəqliyyatı ilə sərnişin daşımalarını tənzimləyən normativ hüquqi aktlara dair xüsusi hazırlıq keçməlidirlər. Taksi minik avtomobillərinin sürücüləri üçün xüsusi hazırlığın keçirilməsi qaydası, proqramı və müddəti müvafiq icra hakimiyyəti orqanı tərəfindən müəyyən edilir.
Yeni qanun taksi xidmətlərinə nələri dəyişəcək? Tənzimləmələr necə olacaq?
Bu barədə Ednews-a nəqliyyat məsələləri üzrə ekspert Eldəniz Cəfərov bildirib ki, özü və avtomobili üçün icazə vərəqəsi olmayan vətəndaşlar artıq taksi operator şirkətləri ilə müştərək əməkdaşlıq edə bilməyəcəklər:
“Avtomobil nəqliyyatı haqqında qanundakı dəyişiklikdən sonra vətəndaşlar fərdi qaydada taksi fəaliyyəti ilə məşğul olurlarsa, bu zaman onlar mütləq həm taksi fəaliyyətində istismar etdikləri avtomobil üçün, həm də özləri üçün xüsusi icazə vərəqələri almalı olacaq və həmin nəqliyyat vasitəsində məcburi qaydada taksometri istifadə etməli olacaqlar. Həmçinin əgər operator şirkətlər bu gün sadəcə taksi sürücüləri ilə müştərək çalışaraq onlara komissiya haqqı ödəyirdisə, bundan sonra həmin operator şirkətlər artıq taksi operatoru və ya taksi şirkəti adlandırılacaq ki, bu da onların üzərinə müəyyən öhdəliklər qoyur. Xüsusi icazə vərəqəsi olmayan vətəndaşlar isə artıq taksi operator şirkətləri ilə müştərək əməkdaşlıq edə bilməyəcəklər. Bu isə o deməkdir ki, taksi operator şirkətləri istənilən şəxsi sürücü kimi dəvət edə bilməyəcəklər və bu proses birbaşa müvafiq dövlət qurumu tərəfindən tənzimlənəcək.
Taksi qiymətləri dəyişən tarixdir. Bununla yanaşı Nazirlər Kabinetinin 2019-cu ildə qəbul etdiyi tövsiyyə edilən qiymətlər də var. Taksi qiyməti 1.50 AZN-dən başlayır. Daha sonra hər km-a görə 0.70 qəpikdən başlayır. Bu km 5 km və 10 km-dan sonra müvafiq olaraq qiymətlər km-görə 0.50 qəpiyə enir. Bu tövsiyyə edilən qiymətlərdir."
Ekspert E.Cəfərov əlavə edib ki, dəyişikliklərə görə, taksi operator şirkətləri taksi fəaliyyətində istifadə olunan avtomobilin marşrutu haqqında, taksi sürücüsü haqqında günlük, həftəlik, aylıq, hətta illik hesabat tələb edə biləcəklər:
“Artıq taksidən istifadə edən sərnişinlərin şəxsi məlumatları da müvafiq dövlət qurumunda saxlanıla biləcək. Əvvəllər bu, sadəcə taksi operator şirkətlərində saxlanılırdı. Sərnişinlərin şəxsi məlumatları dövlətə ötürülmürdü. Lakin bundan sonra həm taksi operator şirkətlərində bu məlumat olacaq, həm də dövlət qurumunda bu məlumat olacaq ki, vətəndaş kimdir, hansı telefon nömrəsindən istifadə edib, hansı marşrutda və hansı saatlarda hərəkət edib və s.”.
Oğuz