"Cana”, “Nəmuşka”, “Viva”, “Azka”, "Samovar" - Nazirlər Kabineti yanında Terminologiya Komissiyasının yaydığı məlumata görə, bunlar son dövrlərdə bəzi valideynlər tərəfindən yeni doğulan uşaqlara verilən adlardır. Valideynlər niyə övladlarına bu cür adlar verirlər?

Bu barədə Ednews-a sosioloq Lalə Mehralı bildirdi ki, Azərbaycanda şəxsiyyəti, şərəf və ləyaqəti alçaldan adlar daşıyan kifayət qədər çox insan var:

"Təsəvvür edin, vətəndaşlarımız arasında Alabaş, Cinayət, Fəlakət, Traktor, Qarın, Qəmiş, Paçağa kimi adlar daşınyanlar var. Bir neçə il əvvəl uşağına Xiyarə adı vermək istəyən olmuşdu, icazə verilməmişdi. İnanmıram ki bu adları uşağına qoyan valideynlər normal dərrakə, zəka sahibi olsunlar".

L.Mehralı qeyd etdi ki, doğrusu, uşaqlara həm milli köklü, həm də müasir ad seçməyin tərəfdarıyam. Həmçinin mənası gözəl, bütün dillərdə səslənməsi estetik, virtual platformada istifadəsi rahat olmalıdır:

"O səbəbdən uşaqlara ad seçəndə tərkibində ə, ü, ğ, x, ö, ş kimi hərflər olan adlar olmamasına diqqət etmək lazımdır ki, virtual platformada yazıldıqda dəyişikliyə uğramasın.

Uşağına Məhəmməd adı verib onu Maqa, Mika çağıranları çox görürəm. Adı uşağa bəyənərək, sevərək qoymaq lazımdır, o addan nə uşaq, nə də valideyn narahat olmamalıdır. 

Ölkəmizin adqoyma mədəniyyətində təkrarlanan ad çoxdur, bir sinifdə 3 Mədinə, 4 Məhəmməd, 2 Hüseyn, 5 Zəhra olur. Kim olduğu anlaşılsın deyə uşaqlara ayama qoşulur – eynəkli Məhəmməd-qara Məhəmməd, balaca Zəhra-uzun Zəhra, arıq Hüseyn, kök Hüseyn. Əslində ad alternativimiz çoxdur, amma var olan adları bəyənməyən olanda da yaradıcılığı olan özü yeni ad yarada bilər, milli köklü və gözəl mənası olan. Bütün hallarda uşaqlara gözəl ad verin ki, adından utanmasın".

Oğuz