Türkiyədə TikTok sosial media platformasının qadağan edilməsi yenidən gündəmə gəlib. Türkiyə Böyük Millət Məclisində bu barədə müzakirələr aparılıb. Türkiyə Böyük Millət Məclisində bununla bağlı genişmiqyaslı qanun layihəsi hazırlanır. Bəs görəsən, bu qadağa Azərbaycanda da tətbiq edilə bilərmi?
Mövzu ilə bağlı Ednews-a açıqlamasında millət vəkili Hikmət Babaoğlu bildirdi ki, ölkəmizdə olan normal ictimai münasibətlər zamanı vətəndaşlara verilən hüquqlar sosial şəbəkədə də tətbiq oluna bilər:
“Necə ki, ölkədə normal ictimai münasibətlərdə etik qaydaları, çərçivələri gözlüyürük, eyni şəkildə bunu virtual məkanda da etməyə borcluyuq. Ölkə olaraq hər bir fərdin azadlığına, toxunulmazlığına hörmət edirik. Bu gün virtual məkan real ictimai münasibətlərimizin bir parçası kimi çıxış edir. Bəzi insanlar canlı şəkildə ünsiyyətdə olmadıqlarına görə hesab edirlər ki, burada qanunlar tətbiq oluna bilməz və istədikləri kimi digər vətəndaşların hüquq və azadlıqlarını məhdudlaşdıra bilərlər, onlara qarşı qeyri-etik hərəkət edə bilərlər”.
Milli Məclisin deputatı Ceyhun Məmmədov da məsələyə münasibət bildirib. Onun sözlərinə görə, sosial şəbəkələrdən doğru-düzgün istifadəni təbliğ etmək üçün ciddi maarifləndirmə işləri aparmalıdır:
"Bunun üçün xüsusilə tədris müəssisələrində, orta məktəb və universitetlərdə, eləcə də televiziya kanallarında, müvafiq olaraq, təbliğat xarakterli tədbirlər keçirilməli, proqramlar təşkil edilməlidir. Sosial şəbəkələrin mənfi və müsbət cəhətləri uşaqlar və gənclərə düzgün aşılanmalıdır. Onu da qeyd edim ki, insanların sosial şəbəkələrdən pul qazanmaq istəyini onların sosial vəziyyəti ilə əlaqələndirmək doğru deyil. Yəni, sosial rifah səviyyəsinin aşağı olması hansısa əxlaqsız davranış üçün əsas olmamalıdır. Belə asan yola qaçmaq düzgün deyil. Sosial vəziyyəti pis olduğu üçün "Tiktok" kimi sosial şəbəkələrdə məhz əxlaq kodekslərinə zidd paylaşımlar etməklə pul qazanmaq haqlı seçim deyil. Sosial vəziyyəti yaxşı deyilsə, iş tapsın, işləsin və vəziyyətini yaxşılaşdırmağa çalışsın. Hər kəs düzgün yol tutmağa cəhd etməlidir".
Oğuz