Gəncə şəhərində 275 küçəni əhatə edəcək 21 min ədəd led lampaların quraşdırılması, 50 km uzunluğunda alüminium kabellərin, 371 ədəd elektrik şkafının və işıq dirəklərinin yenilənməsi nəzərdə tutulub.
"Report"un qərb bürosunun məlumatına görə, bu məqsədlə Gəncədə Avropa Yenidənqurma və İnkişaf Bankından ayrılan kredit vəsaiti ilə icra olunan bərk məişət tullantılarının idarə edilməsi layihəsi üzrə məsləhətçi şirkət “Teknik TEMPO Uluslararası Mühendislik A.Ş.” və şəhərdə küçələrin işıqlandırılması layihəsi üzrə məsləhətçi şirkət “Urban Technology Alliance” ilə Gəncə Şəhər İcra Hakimiyyəti arasında layihənin icra edilməsində texniki dəstək və məsləhət xidmətləri göstərmələrinə dair müqavilə imzalanıb.
Layihəyə əsasən, Gəncə şəhərində tullantıların toplanması, digər şəhər xidmətləri üçün nəqliyyat vasitələrinin, avadanlıqların, o cümlədən tullantı konteynerlərinin alınması, tullantıların atılma məntəqəsi və dayanacağın təkmilləşdirilməsi ilə bağlı tikinti işlərinin görülməsi nəzərdə tutulub.
İcra ediləcək ikinci layihə çərçivəsində o cümlədən küçə işıqlandırılması idarəetmə sisteminin yaradılması və həmin sistemin idarəedilməsi istiqamətində təlim xidmətlərinin göstərilməsi planlaşdırılır.
İmzalanma mərasimində çıxış edən rəsmilər həyata keçirilən layihələrin Gəncə şəhəri üçün əhəmiyyətini vurğulayıb və əlavə olaraq layihələr icra olunarkən şəhərin tarixi xüsusiyyətinin də nəzərə alınmasını tövsiyə ediblər.