Son günlər həm mətbuatın, həm də ictimaiyyətin diqqət mərkəzində olan mövzulardan biri də sosial medianın məhdudlaşdırılması ilə bağlıdır. Maraqlıdır, Azərbaycanda sosial şəbəkələr məhdudlaşdırırla bilər?
Mövzu ilə bağlı Müasir Müsavat Partiyasının sədri Hafiz Hacıyev Ednews-a açıqlamasında bildirdi ki, demokratik bir dövlətdə sosial şəbəkələrin məhdudlaşdırılması doğru deyil:
“Lakin, bəzi sosial şəbəkələrdə Azərbaycan mentalitetinə zidd olan və insanların mənəviyyatını pozan davranışların qarşısını almaq üçün bir sıra tədbirlər görülə bilər. Sosial şəbəkələr çağdaş dövrdə məlumatlanma, marifləndirmə kimi mövzularda böyük rol oynayır və bu platformalardan cəmiyyətə faydalı olacaq bir şəkildə istifadə etmək lazımdır”.
Mətbuat Şurası İdarə Heyətinin üzvü, jurnalist Hacıbəy Heydərli sözügedən mövzu ilə bağlı fikirlərini bölüşüb. Onun sözlərinə görə, sosial şəbəkələri məhdudlaşdırmaq yerinə onlardan daha faydalı bir şəkildə necə istifadə edə bilərik mövzusu müzakirə olunsa daha yaxşı olar:
“Hansısa sosial şəbəkənin məhdudlaşdırılması çıxış yolu deyil. Azərbaycanda ən çox istifadə olunan və məhdudlaşdırılması gündəmə gələn tiktok sosial şəbəkəsidir. Hansı ki, bu platformada milli mənəvi dəyərləri korlayan, şəxsi həyatların nümayiş olunması, yüngül həyat tərzi sürən insanların daha fəal olması, cəmiyyət tərəfindən qınaq obyektinə çevrilən paylaşımların edilməsi, tiktok platformasının bağlanması ilə bağlı fikirlərə gətirib çıxarmışdır”.
Onun fikrincə, azyaşlıların sosial şəbəkədən istifadə etməsi doğru deyil. Valideynlər uşağlarını sosial şəbəkədən uzaq tutmalıdırlar:
“Sosial şəbəkədə olan qeyri- etik videolar azyaşlıların tərbiyəsinə çox mənfi təsir göstərir. Həmçinin bəzi tiktokerlər öz övladları ilə canlı yayım açaraq təhqir, söyüşlə danışaraq reytinq toplamağa çalışırlar. Artıq tiktokda mənəvi dəyərləri korlayan 2 milyondan çox video silinib. Bundan sonraki mərhələdə tiktoku normal kontent yaradan sosial şəbəkə kimi görə bilərik. Sosial şəbəkələr çağdaş dövrdə məlumatlanma, marifləndirmə kimi mövzularda böyük rol oynayır və bu platformalardan cəmiyyətə faydalı olacaq bir şəkildə istifadə etmək lazımdır”.
Aysel
