1994-cü il iyulun 3-də “28 May” və “Gənclik” metro stansiyaları arasında qatar partlayışı baş verdi.
Saat 08:30-da “28 May” stansiyasından çıxmış qatarın ikinci vaqonunda bomba partladı, həmin vaxt qatar “Gənclik” stansiyasının platformasından beş yüz metr aralıda idi. Elektrik qatarının vaqonları alovlandı. Terror aktı nəticəsində 13 nəfər həlak oldu, 58 sərnişin isə yaralandı.
Ednews xəbər verir ki, Partlayışın təşkilində ittiham olunan Azərbaycan vətəndaşı Azər Aslanov Moskva şəhərində həbs edildi. 1997-ci il noyabrın 29-da o, Azərbaycan Respublikasına ekstradisiya edildi.
1998-ci ildə Aslanov bildirdi ki, bu terror aktını həyata keçirmək əmri ona Ermənistan əsirliyində olduğu vaxt publisist Zori Balayandan verilib. Məhkəmə terrorçunu ömürlük həbs cəzasına məhkum etdi. İstintaq müəyyən etdi ki, terror aktının təlimatçıları Ermənistanın xüsusi xidmət orqanlarının əməkdaşları olub.
Aslanovun ifadələri əsasında Balayan barəsində də cinayət işi açıldı və 1999-cu ildə Azərbaycan Respublikası Baş Prokurorluğunun təqdimatı əsasında İnterpol onu xüsusi təhlükəli cinayətkar kimi beynəlxalq axtarışa verdi. Daha sonra Azərbaycan Respublikası prokurorluğu onu MDB ölkələrində dövlətlərarası axtarışa verdi.
Bir neçə il əvvəl erməni hərbçiləri Aleşa Xosrovyan və Lüdvig Mkrtçyan tərəfindən azərbaycanlı əsirlərə işgəncə verilməsi işi üzrə zərərçəkmiş Zahid Həsənov bildirdi:
“1994-cü ildə Bakıda metronu partladan Azər Aslanov mənimlə birlikdə əsir götürülmüşdü. Mən, Sergey, Azər Aslanov və daha bir məhkum Xankəndidə saxlanılırdıq. 5-6 erməni hərbçisi gəldi və Azəri komandan otağını təmizləməyə apardılar. Azər iki saat sonra qayıtdı, sonra onu yenidən apardılar. Erməni xüsusi xidmət orqanları onunla danışırdılar. Azərin təlimatı Samvel Babayanın otağında aparılırdı. Ona təlimat verənlərdən biri Lüdvig Mkrtçyan idi. Onlar bir saatdan çox danışdılar. Sergey gəldi və dedi ki, Azər otağı təmizləməyib. Məlum oldu ki, ermənilər Azəri ələ alıblar. Bundan sonra ona istədiyi yeməyi verdilər.
Məlum oldu ki, Azər Aslanov ermənilərlə əməkdaşlığa gedib. Həmin il o, Bakı metrosunda partlayış törətdi. Mən əsirlikdən qayıdanda öyrəndim ki, Sergey məhkumluq dövründə güllələnib”.
