Beynəlxalq Avrasiya Mətbuat Fondunun nümayəndə heyəti BMT-nin İnsan Hüquqları şurasının 58-ci Sessiyasında iştirak etmək və sessiya çərçivəsində BAMF-ın yan tədbirini təşkil etmək məqsədilə BMT-nin İsveçrənin Cenevrə şəhərində yerləşən qərargahına səfər edib. BAMF-ın prezidenti Umud Mirzəyevin, Proqram departamentinin əməkdaşı John Ayomidenin və təşkilatın xüsusi nümayəndəsi Nik Nvolisanın iştirak etdiyi səfər çərçivəsində BMT rəsmiləri və Cenevrədə təmsil olunan QHT-lər ilə görüşlərin keçirilməsi də nəzərdə tutulub.
Qeyd edək ki, “Konflikt zonalarında uşaqların hüquqları” adlı yan tədbir BAMF-ın təşkilatçılığı və Azərbaycan Respublikası Qeyri-Hökumət Təşkilatlarına Dövlət Dəstəyi Agentliyi dəstəyi ilə Bakı vaxtı ilə 27 mart, 18:00-da Cenevrə ofisinin 25-ci zalında keçiriləcək. Tədbirdə müasir dünyada münaqişələrin dağıdıcı təsirlərinə məruz qalan azyaşlıların, o cümlədən, ötən əsrin 80-ci illərinin sonunda öz doğma torpaqlarından deportasiya olunan və Birinci və İkinci Qarabağ müharibələrinin qurbanına çevrilmiş azərbaycanlı uşaqların hüquqlarından danışılacaq.
