Elxan Şahinoğlu: "Münasibətləri bərpa etmək Amerika üçün çətin olacaq"
Son günlər İran, Fələstin, Türkiyə kimi islam dövlətləri ilə ciddi gərginlik yaşayan ABŞ rəhbərliyi, bu dəfə Pakistan əleyhinə ciddi bəyanatlar səsləndirməkdədir. Pakistana göstərilən maliyyə yardımını dyandıracağını bildirən Tramp administrasiyası, ABŞ-ın iradəsinə qarşı gələn digər ölkələri də oxşar aqibətlə təhdid etməkdədir.
Maraqlıdır, Pakistanla münasibəti gərginləşdirmək ABŞ-a nə vəd edir? Bu, Amerika ilə islam dünyası arasındakı uçurumu daha da genişləndirə bilərmi?
"Atlas" Araşdırmalar Mərkəzinin və Qərb Universitetinin Tətbiqi Politologiya Mərkəzinin rəhbəri Elxan Şahinoğlu məsələ ilə bağlı maralı fikirlər səsləndirib:
"Vaxt var idi ki, Pakistan ABŞ-ın bölgədəki əsas tərəfdaşlarından biri idi. 1979-cu ildə sovetlər Əfqanıstana hərbi müdaxilə edəndən Pakistanın ABŞ üçün önəmi daha da artdı. ABŞ sovetləri zəiflətmək üçün oradakı mücahidlərə dəstək verirdi. Mücahidlərə Pakistan da dəstək verirdi. Pakistan üzərindən də mücahidlər yardım alırdılar.
Bu gün isə ABŞ Pakistanı Talibana, terrorçulara dətək verməkdə ittiham edir. Guya Pakistan kəşfiyyatının terrorçularla əlaqəsi var. Bu, heç də inandırıcı görünmür.Pakistan terrorçularla hər hansı əməkdaşlığa getməz. Çünki belə olarsa, ilk növbədə özü üçün problem yaradar.
ABŞ son vaxtlar Hindistanla yaxınlaşmağa maraq göstərir. Hindistanla Pakistan arasında isə münsibətlər gərgindir. Hindistana daha çox üstünlük verdiyi üçün Pakistanı arxa plana çəkib. Bu iki səbəbdən Pakistana yardımlar kəsilib. Fəsləstinlə bağlı da oxşar addımlar atılıb.
Pakistana qarşı atdığı addımlar ABŞ-ı islam və ərəb dünyasından bir qədər də uzaqlaşdıracaq. Daha sonra bu mövqeləri bərpa etmək ABŞ üçün çətin olacaq".