Martın 31-də Türkiyədə bələdiyyə seçkiləri keçirildi. Bu seçkilər zamanlı çox böyük qalmaqallar baş verdi. Müxalif bir komandanın nümayəndəsinin bələdiyyə seçkilərində qalib gəlməsi qalmaqala səbəb oldu. Hər iki tərəf bir-birini saxtakarlıqda ittiham edib, böhtan atmaqla məşğul idi. AKP-nin yenidən seçki keçirmək tələbi YSK-ya təqdim olundu. YSK bu seçkinin nəticələrinin ləğv olunması və yenidən seçki keçirmək barədə qərar qəbul edib. Daha əvvəl də Türkiyədə keçirilən seçkilərdə hansısa rayonlarda və şəhərlərdə bələdiyyə seçkilərinin ləğv olunması qeydə alınmışdı. Lakin bu dəfə belə bir hal Türkiyənin ən böyük meqapolisi İstanbulda baş verdi. YSK-nın elan etdiyi nəticələrə görə, İmamoğlu və Yıldırım arasında çox da böyük fərq yoxdur və 13 min səsə bərabərdir. Bu isə 1% belə etmir. İndi isə, Türkiyə cəmiyyəti CHP və AKP tərəfdarları olmaqla ikiyə bölünüb.
CHP mətbuatda AKP-ni şantaj etməklə məşğul olur. Yenidən seçki keçirilsə insanları küçəyə tökərək, AKP-nin anti demokratik olduğunu onlara sübut edəcəklərini deyərək şantaj edirlər. İyundakı seçkilər CHP AKP arasında olacaq. Belə bir fikir var ki, Ərdoğan anti-demokratik yola əl atır və YSK-nı öz istədiyi kimi idarə etməyə başlayır. Lakin bu belə deyil. Hesablanan səslərdə 1% səs fərqi olub. YSK da bunu nəzərə alaraq, yenidən seçki keçirir.
İstanbul böyük bir meqapolisdir. Heç bir iqtidar onu itirmək istəməz. Ərdoğan və AKP hakimiyyətinin planlarının bir çox hissəsi İstanbulla bağlıdır. Çünki, İstanbul Türkiyədə turizmin daha çox inkişaf etdiyi, ən çox maddiyat gətirən, pul kütləsinin, sənaye obyektlərinin çox olduğu bir şəhərdir. AKP bilir ki, orada CHP olduğu vaxtda bu layihələri reallaşdırmaqda çox çətinliklərlə üzləşər və ya həyata keçirməyə bilər.
CHP-nin yaratdığı Türkiyə ilə və AKP-nin yaratdığı Türkiyə, İstanbul arasında böyük bir fərq var. Metroların, binaların, yolların tikilməsinə CHP həmişə qarşı çıxıb. CHP yenə də layihələrin həyata keçirilməsində AKP-yə böyük problemlər yaradacaq. Və bugün İstanbul heç də inkişafdan geri qalmayıb. Əksinə inkişaf edib. İstanbul həm maliyyə cəhətdən, həm layihələr baxımdan hakimiyyətin əlində olmalıdır ki, hakimiyyət bu ölkədə işlər görə bilsin. Əslində, bu seçkinin keçirilməsi Türkiyənin iqtisadiyyatı üçün də böyük zərbədir. Hər seçkinin keçirilməsinə böyük maliyyə sərf olunur. Türkiyənin maliyyə durumu bəllidir. Artıq xarici dövlətlərdən də Türkiyəyə təzqiqlər başlayıb. Türkiyənin anti -demokratik olduğunu deyirlər. Bu bir tərəfdən onun xaricdə imicinə zərbə vurur.
Ancaq Türkiyə üçün əlbəttə ki, seçki də vacibdir. Türkiyə üçün ən əsas problem Türkiyə iqtisadiyyatının dirçəldilməsi və kənardan gələn təzyiqləri azaltmasıdır. Ümid edirik ki, Türkiyə bunun öhdəsindən gələcək. Kimin qalib gələcəyinə insanlar qərar verəcək. Yəqin ki, onlar düzgün qərar verəcək. Və ümid edək ki, Türkiyədə demokratiya qalib gələcək.
Politoloq Ramiyə Məmmədova