Xəbər verdiyimiz kimi, Azərbaycan Xarici İşlər Nazirliyi (XİN) Gürcüstanın Abxaziya bölgəsində 25 avqust 2019-cu il tarixində keçirilmiş qondarma "prezident seçkiləri"nə münasibət bildirib.

XİN-in bəyanatında deyilir ki, Azərbaycan Respublikasının Xarici İşlər Nazirliyi Gürcüstanın suverenliyini və ərazi bütövlüyünü dəstəklədiyini bir daha təsdiqləyir və 25 avqust 2019-cu il tarixində Gürcüstanın Abxaziya bölgəsində keçirilmiş qondarma "prezident seçkiləri"ni, həmçinin, onların nəticələrini tanımır.

Qeyd olunur ki, Azərbaycan Xarici İşlər Nazirliyi Abxaziya məsələsinin beynəlxalq hüququn norma və prinsiplərinə uyğun olaraq sülh yolu ilə həlli üçün danışıqların davam etdirilməsinin vacib olduğunu hesab edir.

Məsələylə bağlı Milli Məclisin deputatı, Azərbaycan-Gürcüstan parlamentlərarası dostluq qrupunun rəhbəri Əflatun Amaşov öz fikirlərini Eurasia Diary ilə bölüşüb.

Millət vəkili bildirib ki, Azərbaycan və Gürcüstan hər zaman bir-birlərinin ərazi bütövlüklərinə hörmətlə yanaşıb.

"Azərbaycan və Gürcüstan qonşu və dost ölkələrdir. Artıq bizim münasibətlərimiz starteji əməkdaşlıq səviyyəsinə qalxıb. Biz müxtəlif qurumlarda Avropa Şurasında, ATƏT-də, Qara Dəniz İqtisadi Əməkdaşlıq Təşkilatında, GUAM-da və s. təşkilatlarda adətən regionumuzun maraqları naminə eyni mövqedən çıxışlar edirik. Azərbaycanla Gürcüstan hər zaman  bir-birlərinin ərazi bütövlüyünə hörmətlə yanaşıb. Abxaziyada keçirilən məlum "seçkilərə" gəlincə, Azərbaycan XİN mövqeyini birmənalı qaydada ifadə edib. Biz Gürcüstanı vahid dövlət kimi tanıyırıq və onun beynəlxalq səviyyədə qəbul edilmiş əraziləri çərçivəsində tanıyırıq. Eyni zamanda, Gürcüstan tərəfi də Azərbaycanın ərazi bütövlüyünə hörmətlə yanaşır. Biz Gürcüstanın ərazi bütövlüyünə xələl gətirən və onun ərazilərində yaranmış qondarma qurumların "seçkilərini" heç zaman tanımamışıq. Eyni zamanda, Gürcüstan da Dağlıq Qarabağda qondarma qurumun keçirdiyi "seçkilərlə" bağlı həmişə Azərbaycanın ərazi bütövlüyünü dəstəkləyən bəyanatlar verib. Son belə bəyanat 2017-ci ildə qondarma qurumun qondarma referendumla bağlı keçirdiyi Gürcüstan tərəfinin həmin o referendum nəticələrinin tanınmaması ilə bağlı verdiyi bəyanatdır", - deyə Ə.Amaşov bildirib.

Nicat İsmayılov

Eurasia Diary