Xəbər verdiyimiz kimi, Pakistanın Xarici İşlər naziri Şah Mahmud Qureyşi İslam Əməkdaşlıq Təşkilatının (İƏT) BMT Baş Məclisi çərçivəsində keçirilmiş qrup görüşündə dünyanın Ermənistana Azərbaycan ərazilərini azad etməsi və işğala son qoyması üçün daha çox təzyiq göstərməsini tələb edib.
O qeyd edib ki, Pakistan Azərbaycanı dəstəkləyir və Ermənistan kimi təcavüzkar qüvvələrin dünyadakı əsas güclər tərəfindən sərt şəkildə qınanılmadığı təqdirdə sülhü bərqərar etmək mümkün olmayacaq.
Mahmud Qureyşi əlavə edib ki, Dağlıq Qarabağ on illiklər boyunca insanların əzab-əziyyət çəkməsinə səbəb olmuş bir yanar atəşdir. Kəşmir və Dağlıq Qarabağ oxşar hallarla üzləşib. Nazir Ermənistan silahlı qüvvələrinin Dağlıq Qarabağı dərhal tərk etməsini tələb edib.
Pakistanlı nazirin bu açıqlamaları Azərbaycan və Pakistan arasındakı münasibətlərin nə qədər yüksək səviyyədə olduğunu bir daha ortaya qoyub. Bununla bərabər, qeyd etmək lazımdır ki, son aylarda xüsusən Ermənistan Baş Naziri Nikol Paşinyanın Qarabağ problemi ilə əlaqədar səsləndirdiyi populist və bir o qədər də radikal bəyanatlar Azərbaycan və Ermənistan arasında müharibə riskini olduqca artırıb. Daha doğrusu hazırki siyasi şəraitdə Azərbaycanın öz torpaqlarını işğaldan azad etməsi üçün müharibədən başqa yolu qalmayıb.
Bəs hər zaman Azərbaycanın beynəlxalq tribunalarda maraqlarını müdafiə edən və dəstəkləyən Pakistan Qarabağ müharibəsi başlaryarsa, Azərbaycana dəstəyini hərbi sahədə davam etdirə bilərmi? Pakistan Xarici İşlər nazirinin İƏT toplantısında Ermənistan rəhbərliyinə verdiyi sözlü və qeyri-rəsmi notanın arxasında hansı məqamlar dayanır?
Eurasia Diary bu suallara pakistanlı ekspert, Pakistanın “DND Xəbər Agentliyi”nin rəhbəri, uzun illər hərbi və diplomatik müxbir kimi çalışmış tanınmış jurnalist Ağa İqrar Haruna müraciət edib.
O, Pakistanın Azərbaycanın müstəqilliyindən bu yana bir qardaş kimi yanında durduğunu vurğulayıb:
“Pakistan hər zaman bir qardaş kimi Azərbaycana dəstək olub, onun yanında durub. Pakistan Azərbaycanın müstəqilliyi tanıyan ilk dövlətlərdən biridir. Pakistan xalqı, milləti və hökuməti hər zaman beynəlxalq arenalarda Azərbaycanın maraqlarını müdafiə edib. Bizim Xarici İşlər naziri Qureyşinin sonuncu çıxışı bir daha iki dövlət arasındakı qardaşlıq əlaqələrini ortaya qoyub”.
A.İ.Harun Pakistanın Kəşmir problemi ilə Azərbaycanın Dağlıq Qarabağ problemi arasında bir çox oxşar cəhətlərin olduğunu qeyd edib və Pakistan Xarici İşlər naziri Qureyşinin açıqlamalarını bu müstəvidən təhlil edib:
“Hazırda Kəşmirin vəziyyəti də Qarabağın vəziyyəti ilə bənzərdir. Nəzərə alaq ki, orada da Qarabağdakı kimi müsəlmanlara qarşı soyqırımlar və qətliamlar törədilib. Ermənistanın hərbi təcavüzü nəticəsində bir milyon azərbaycanlı öz yurd-yuvalarından didərgin düşüb ki, Kəşmirdə də buna bənzər hallar baş verib. Ona görə də Pakistan xalqı və hökuməti Azərbaycan xalqının üzləşdiyi vəziyyəti çox gözəl başa düşür. Pakistan Xarici İşlər naziri Qureyşinin sözügedən bəyanatı Pakistan xarici siyasəti üçün mühüm hadisədir. Bu bəyanatdan da göründüyü kimi Pakistan ciddi surətdə Ermənistandan Dağlıq Qarabağı dərhal tərk etməsini tələb edir”.
Ekspert həmçinin Dağlıq Qarabağda müharibə başladığı zaman Pakistanın buna biganə qalmayacağını və Azərbaycana dəstək olacağını əminliklə vurğulayıb:
“Bir peşekar jurnalist, hərbi və diplomatik müxbir kimi deyə bilərəm ki, Qarabağda müharibə başlasa Pakistan hərbi köməyini Azərbaycandan əsirgəməyəcək. Təsadüfi deyil ki, Pakistan özünün ən yüksək səviyyəli silahlarını Azərbaycana təklif edir. Əgər birbaşa hərbi münaqişə baş verərsə, Pakistan hər bir yola bir dost kimi və Azərbaycanın güvəndiyi bir ölkə kimi ona dəstək olacaq...”
Nicat İSMAYILOV