10 yaşlı Zeynəb karate üzrə beynəlxalq turnirdə qızıl medal aldı - FOTOLAR | Eurasia Diary - ednews.net

18 Noyabr, Bazar ertəsi


10 yaşlı Zeynəb karate üzrə beynəlxalq turnirdə qızıl medal aldı - FOTOLAR

İdman A- A A+
Bu günlərdə Azərbaycanın Milli Qəhrəmanı, Şuşa uğrunda  döyüşlərdə şəhid olmuş məşhur tankçı Albert Aqarunovun 50 illik yubileyinə həsr olunmuş karate üzrə “Olimpiya ümidləri” beynəlxalq uşaq turniri keçirilib. Turnirin  qaliblərindən biri də Xətai rayonu 261 saylı liseyin 5-ci sinif şagirdi Nəbiyeva Zeynəb Anar qızı olub.

Bu haqda Moderator.az-a qalibin valideynləri məlumat verib. 10 yaşlı Azərbaycan qızı “Sərhədçi” Olimpiya İdman Mərkəzində baş tutmuş  bəhs edilən yarış çərçivəsindəki müxtəlif nominasiyalar üzrə 1-ci və 2-ci yerləri qazanaraq qızıl və gümüş medallara, eləcə də müvafiq fəxri diplomlara layiq görülüb.

2018-ci ildən rayon ərazisindəki “Qara qaplan” karate klubunun (“Baku Maks” idman klubu) üzvü olan Z. Nəbiyevanın  məşqçisi Xudavediyev Seymur Rəşid oğludur. Zeynəbin ilk döyüşü 2018-ci ildə “Qara qaplan” və “Budo-kan” klublarının birgə hazırladığı Aprel şəhidlərinin xatirəsinə həsr edilmiş turnirdə olub. Həmin döyüşdə o, 10-11 yaşlılar arasında 2-ci yeri qazanaraq gümüş medala və fəxri diploma layiq görülüb.

5-ci sinif şagirdinin 2-ci döyüşü isə Heydər Əliyevin xatirəsinə həsr olunmuş karate-do üzrə turnirdə olub. Həmin yarışda da Z.Nəbiyeva 10 yaşlılar arasında 33 kq çəki dərəcəsində yüksək bacarıq nümayiş etdirərək  2-ci yeri tutub, gümüş medal və diplomla  təltif edilib.

Qeyd edək ki, 10-dan artıq ölkədən 6-13 yaşlı 800 karateçinin qatıldığı iki gün davam edən beynəlxalq turnirdə birinci yeri məhz Zeynəb Nəbiyevanın üzvü  olduğu "Qara Qaplan" komandası tutub. İkinci pillədə "Zirvə" komandası qərarlaşıb. "Arpaçay" karate klubu isə yarışı üçüncü yerdə başa vurub.

Onu da xatırladaq ki, 10 yaşlı Zeynəbin son yarışındakı qələbəsi  barədə oktyabrın 9-da “Space” telekanalında yayımlanmış verilişdə də bəhs edilib.

Balaca idmançı qızımıza döyüşlərdə yeni-yeni uğurlar diləyirik.

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...