Son günlər idman mediasında məşhur portuqaliyalı mütəxəssis Joze Mourinyonun "Fənərbağça"dan ayrılacağı ilə bağlı yayılan şayiələrə özü nöqtə qoyub.
EDnews xəbər verir ki, Mourinyo İstanbul nəhəngi ilə yollarını ayırmaq niyyətində olmadığını bəyan edib. Təcrübəli baş məşqçi klub rəhbərliyinin ona tam etimad göstərdiyini və növbəti mövsüm UEFA Çempionlar Liqasına vəsiqə qazanmaq üçün ciddi şəkildə çalışacaqlarını bildirib:
“Klub prezidenti mənə güvənir. Növbəti mövsüm UEFA Çempionlar Liqasının liqa mərhələsində mübarizə aparmaq üçün çalışmalıyıq. Klub rəhbərliyi ilə hədəflərimiz eynidir. Məhz buna görə də "Fənərbağça"da qalacağam”, – deyə Mourinyo vurğulayıb.
O, həmçinin klubun ambisiyalarına uyğun planların qurulduğunu və qarşıdakı transfer dönəmində komandanın gücləndiriləcəyini də eyhamla bildirib.
Qeyd edək ki, Joze Mourinyonun "Fənərbağça" ilə müqaviləsi 2026-cı ilin yayına qədər qüvvədədir. Onun gəlişi ilə klubun ambisiyaları yenidən yüksəlib və fanatlar 2024/25 mövsümünə böyük ümidlə baxırlar.
Fatima Şükürova // EDnews
