Məşhur futbolçu Devid Bekhem xəstəxanaya düşüb.
“EDnews” xəbər verir ki, bu barədə onun həyat yoldaşı Viktoriya Bekhem sosial media hesabından xəbər verib və futbolçunun əli sarğılı halda xəstəxana çarpayısında uzandığının əks olunduğu görüntülərini paylaşıb.
Kadrlarda Bekhemin sağlamlıq problemlərinə baxmayaraq gülümsədiyi görünür.
"Tez sağal, bizim əziz atamız", - deyə Viktoriya paylaşımına şərh yazıb.
O, əri ilə bağlı hadisənin detalları barədə açıqlama verməyib. Lakin məsələ ilə bağlı məlumatı insayderlər bölüşüblər.
Cütlüyə yaxın mənbənin "The Sun" qəzetinə bildirdiyinə görə, Devid Bekhem illər əvvəl aldığı zədə ilə bağlı gizli əməliyyat keçirib - o, 22 il əvvəl İngiltərə ilə Cənubi Afrika Respublikası arasında keçirilən oyunda biləyini sındırmışdı və oyunu sarğılı əllə davam etdirmişdi. Son rentgen müayinəsi zamanı məlum olub ki, həmin dövrdə istifadə olunan vint hələ də Bekhemin qolunda qalıb və orqanizm tərəfindən sorulmayıb. Bu səbəbdən futbolçu əməliyyat olunmaq məcburiyyətində qalıb.
