Avropanın ən nüfuzlu klub turniri olan UEFA Çempionlar Liqasında mövsümün ən həyəcanlı anı yetişib. Bu gün turnirin final qarşılaşmasında Fransa nəhəngi Paris Sen-Jermen (PSJ) və İtaliyanın köklü klubu “İnter” üz-üzə gələcək. Oyun Almaniyanın Münhen şəhərindəki "Allianz Arena" stadionunda keçiriləcək.
EDnews xəbər verir ki, qarşılaşma Bakı vaxtı ilə saat 23:00-da start götürəcək. Minlərlə azarkeşin tribunadan izləyəcəyi bu oyun həm də milyonlarla tamaşaçının ekran qarşısında izləyəcəyi möhtəşəm futbol gecəsi olacaq.
PSJ bu mövsüm ərzində sərgilədiyi sürətli və texniki oyunla finala qədər irəliləyib. Klubun əsas məqsədi Çempionlar Liqası tarixində ilk dəfə kuboku qazanmaqdır. Ulduz futbolçuların yer aldığı heyət bu məqsəd uğrunda əlindən gələni edəcək.
Digər tərəfdən, “İnter” isə artıq turnirdə üç dəfə çempion olub və bu dəfə dördüncü titul uğrunda mübarizə aparacaq. İtaliya klubu bu mövsüm müdafiədə sabit, hücumda isə sürətli və qəfil zərbələrlə yadda qalıb.
Matçın həyəcanı təkcə azarkeşlər üçün deyil, futbol dünyası üçün də böyük əhəmiyyət daşıyır. Final oyunu, həm də iki fərqli futbol fəlsəfəsinin — PSJ-nin kreativ və hücumçu oyun tərzi ilə “İnter”in taktiki və nizamlı sisteminin toqquşması olacaq.
UEFA Çempionlar Liqası hər il olduğu kimi, bu dəfə də dünyanın ən səviyyəli futbol şousuna çevriləcək. Qalib gələn klub təkcə kubok deyil, həm də Avropa futbolunun zirvəsində möhkəmlənmək şansını əldə edəcək.
Fatimə Şükürova // EDnews
